ក្រុមមន្ត្រីមូលដ្ឋានបាននិយាយថា មនុស្សយ៉ាងតិច ៩នាក់ បានស្លាប់នៅក្នុងឧប្បត្តិហេតុផ្ទុះឆេះរោងចក្រផលិតកាំជ្រួចភ្ញីនៅភាគកណ្តាលប្រទេសថៃ ក្នុងថ្ងៃពុធ ៣០ កក្កដា នេះ ខណៈនគរបាលនៅតែបន្តស្វែងរកអ្នកបាត់ខ្លួនមួយចំនួន បន្ទាប់ពីហេតុការណ៍ផ្ទុះនេះ។ រោងចក្រនេះបានឆាបឆេះនៅម៉ោងក្នុងស្រុកប្រហែល ១១ព្រឹក នៅក្នុងស្រុកមឿង (Mueang) នៃខេត្តសុផាន់បូរី (Suphan Buri) ភាគខាងជើងទីក្រុងបាងកក។

សេចក្ដីរាយការណ៍ពីប្រព័ន្ធផ្សព្វផ្សាយបានដកស្រង់សម្ដីនគរបាលថៃ ដោយនិយាយថា អ្នកស្លាប់នៅក្នុងហេតុផ្ទុះឆេះនោះមានយ៉ាងតិច ៩នាក់ -- ដោយកើនឡើងពីការស្លាប់ដំបូង ៤នាក់-- និងជាច្រើននាក់ទៀតបានរងរបួស ហើយកំពុងសម្រាកព្យាបាលនៅមន្ទីរពេទ្យ ដោយបន្ថែមថា ក្រុមមន្រ្តីកំពុងស៊ើបអង្កេតរកមូលហេតុក្នុងគ្រោះថ្នាក់នេះ។

គួរឱ្យដឹងថា អគ្គិភ័យឆាបឆេះរោងចក្របែបនេះជារឿងធម្មតាណាស់នៅក្នុងប្រទេសថៃ ខណៈដែលការអនុវត្តច្បាប់សុវត្ថិភាពនៅតែទន់ខ្សោយយ៉ាងខ្លាំង។ នៅឆ្នាំ២០២៤ ការផ្ទុះឆេះនៅរោងចក្រផលិតកាំជ្រួចភ្ញីមួយផ្សេងទៀតនៅក្នុងខេត្តដូចខាងលើនេះបានសម្លាប់មនុស្សយ៉ាងហោចណាស់ ២៣នាក់៕