បុគ្គលិកម្នាក់ បានរៀបរាប់ពីឧបទ្ទវហេតុនៅកសិដ្ឋានមួយកន្លែងកាលពីថ្ងៃអង្គារថា ភ្លៀងធ្លាក់ខ្លាំងនៅកោះតៃវ៉ាន់ភាគខាងត្បូងនិងភាគកណ្តាល បានសម្លាប់សត្វជ្រូកចំនួន២.៥០០ក្បាលក្នុងចំណោមសត្វជ្រូក៣.៥០០ក្បាលនៅកសិដ្ឋានមួយក្នុងតំបន់ Chiayi បន្ទាប់ពីទឹកជំនន់បានហូរចូលក្នុងទ្រុងរបស់វា។ 

សត្វជ្រូកដែលនៅរស់ កំពុងត្រូវបានផ្លាស់ប្តូរទីតាំងទៅកាន់ទីតាំងមួយទៀតក្នុងទីក្រុង Changhua ដោយការខាតបង់ត្រូវបានគេប៉ាន់ស្មានដល់ទៅ០,៥លានដុល្លារអាមេរិក ដែលនេះត្រូវបានប៉ាន់ស្មានដោយបុគ្គលិកឈ្មោះ Chiu ជាអ្នកធ្វើការនៅក្នុងផ្នែកកិច្ចការសាធារណៈរបស់កសិដ្ឋាន។ ទំហំនៃទឹកជំនន់គឺមិនធ្លាប់មានពីមុនមកនោះទេ និងធ្ងន់ធ្ងរជាងព្យុះទីហ្វុងមុនៗទៅទៀត។

នៅទូទាំងកោះតៃវ៉ាន់ មនុស្ស៩នាក់បានរងរបួស និង ៨៨ នាក់ត្រូវបានជួយសង្គ្រោះពីអគារ និងពីរថយន្តដែលលិចទឹក នេះបើយោងតាមទិន្នន័យផ្លូវការចេញផ្សាយកាលពីថ្ងៃអង្គារ។ មនុស្សប្រហែល ៣.០០០ នាក់ត្រូវបានជម្លៀសចេញ ខណៈអាជីវកម្ម និងសាលារៀនត្រូវបានបិទ ក្នុងពេលភ្លៀងធ្លាក់ខ្លាំងបានបន្តវាយប្រហារកោះតៃវ៉ាន់រយៈពេលពីរថ្ងៃកាលពីថ្ងៃអង្គារ។