សិង្ហបុរីនិយាយថា ពួកគេត្រៀមខ្លួនរួចរាល់ក្នុងការរួមចំណែកនៅក្នុងការកសាងតំបន់ហ្កាហ្សាស្រ្ទីបឡើងវិញ នៅពេលណាដែលកិច្ចព្រមព្រៀងបទឈប់បាញ់អចិន្រ្តៃយ៍ ត្រូវបានឈានដល់រួចហើយនោះ ។

អនុរដ្ឋមន្រ្តីក្រសួងការបរទេសសិង្ហបុរីប្រចាំតំបន់អាស៊ីប៉ាស៊ីហ្វិកលោក Kevin Cheok បានផ្តល់សេចក្តីថ្លែងការណ៍របស់សិង្ហបុរី នៅកិច្ចប្រជុំអង្គការសហប្រជាជាតិ(UN)នៅបុរីញូវយ៉ក សហរដ្ឋអាមេរិក ស្តីពីការដោះស្រាយបញ្ហាប៉ាឡេស្ទីនដោយសន្តិវិធី និងការអនុវត្តដំណោះស្រាយរដ្ឋ ២ ។

លោកបាននិយាយថា សិង្ហបុរីគាំទ្រផែនការកសាងឡើងវិញអារ៉ាប់ស្នើសុំដោយអេហ្ស៊ីប និងចក្ខុវិស័យរបស់វា សម្រាប់ការកសាងឡើងវិញនៅតំបន់ហ្កាហ្សា ។

សំណើនេះនឹងគ្មានវត្តមានរបស់ក្រុមហាម៉ាសនោះទេ ហើយជំនួសវិញដោយអង្គភាពស្តីទីគ្រប់គ្រងដោយអារ៉ាប់ មូស្លីម និងរដ្ឋលោកខាងលិច ។

ផែនការដែលប្រឆាំងនឹងមហិច្ឆិតារបស់ប្រធានាធិបតីសហរដ្ឋអាមេរិកលោក Donald Trump សម្រាប់ឲ្យតំបន់ហ្កាហ្សាក្លាយជា “តំបន់ឆ្នេរមជ្ឈិមបូព៌ា”នោះ នឹងបដិសេធន៍សំណើរបស់សហរដ្ឋអាមេរិកឲ្យមានការជម្លៀសជនប៉ាឡេស្ទីនទ្រង់ទ្រាយធំចេញពីតំបន់ហ្កាហ្សា ។

នេះគឺជាលើកដំបូងហើយដែលសិង្ហបុរី បានបង្ហាញការគាំទ្រជាសាធារណៈលើសំណើរបស់អេហ្ស៊ីប ។

កាលពីខែមីនាកន្លងទៅ រដ្ឋអារ៉ាប់ បានអនុម័តសំណើមួយនេះ ខណៈក្រុមរដ្ឋមន្រ្តីការបរទេសរបស់បារាំង អាល្លឺម៉ង់ អ៊ីតាលី និងអង់គ្លេស បាននិយាយថា ពួកគេគាំទ្រផែនការខាងលើ ៕