អតីតអនុប្រធានាធិបតីសហរដ្ឋអាមេរិក មកពីបក្សប្រជាធិបតេយ្យ លោកស្រី Kamala Harris បានប្រកាសកាលពីថ្ងៃពុធ (៣០ កក្កដា) ថា លោកស្រីនឹងមិនឈរឈ្មោះជាអភិបាលរដ្ឋកាលីហ្វ័រនីញ៉ា (California) នៅឆ្នាំ២០២៦ នោះឡើយ ដោយបញ្ចប់ការរំពឹងទុកនានា ដែលថាបេក្ខភាពប្រធានាធិបតីដែលបានបរាជ័យរូបនេះ អាចនឹងស្វះស្វែងរកតំណែងមួយនោះ។

លោកស្រីបានលើកឡើងក្នុងសេចក្ដីថ្លែងការណ៍មួយថា៖ លោកស្រីធ្លាប់បានគិតយ៉ាងហ្មត់ចត់លើរឿងស្នើឱ្យប្រជាជនរដ្ឋកាលីហ្វ័រនីញ៉ា អនុញ្ញាតឱ្យលោកស្រីធ្វើជាអភិបាលរដ្ឋរបស់ពួកគេ ព្រោះតែលោកស្រីស្រឡាញ់រដ្ឋ និងប្រជាជនរបស់រដ្ឋនេះណាស់ ប៉ុន្តែបន្ទាប់ពីការឆ្លុះបញ្ចាំងយ៉ាងស៊ីជម្រៅ លោកស្រីបានសម្រេចចិត្តថានឹងមិនឈរឈ្មោះប្រជែងតំណែងជាអភិបាលក្នុងការបោះឆ្នោតនេះទេ។

លោកស្រី Harris គូសបញ្ជាក់ថា លោកស្រីនឹងមិនឈរឈ្មោះសម្រាប់តំណែងរដ្ឋាភិបាលនៅពេលនេះឡើយ ដោយចំណុចនេះជាការបើកចំហលទ្ធភាពសម្រាប់កិច្ចប្រឹងប្រែងប្រជែងតំណែងប្រធានាធិបតីជាថ្មីនៅឆ្នាំ២០២៨។ លោកស្រី Harris បានរក្សាភាពស្ងប់ស្ងាត់បំផុតចាប់តាំងពីចាញ់ឆ្នោតទល់នឹងលោកប្រធានាធិបតី Donald Trump មកពីបក្សសាធារណរដ្ឋ ក្នុងឆ្នាំ២០២៤ កន្លងទៅ។ 

អភិបាលរដ្ឋកាលីហ្វ័រនីញ៉ាបច្ចុប្បន្ន លោក Gavin Newsom ដែលជាអ្នកប្រជាធិបតេយ្យ បានកាន់តំណែងតាំងពីឆ្នាំ២០១៩មក ដូច្នេះលោកមិនអាចឈរឈ្មោះសម្រាប់ការបោះឆ្នោតឡើងវិញបានទេ ដោយសារការកំណត់អាណត្តិ៕