ទិន្នន័យស្ទង់មតិពីបណ្ដាប្រធានផ្នែកហិរញ្ញវត្ថុ បានបង្ហាញនៅថ្ងៃព្រហស្បតិ៍ (៣១ កក្កដា) នេះថា ចំនួនពីរភាគបីនៃអ្នកលក់រាយរបស់ចក្រភពអង់គ្លេស រំពឹងថានឹងដំឡើងតម្លៃទំនិញកាន់តែខ្ពស់បន្ថែមទៀតនៅឆ្នាំក្រោយនេះ ដោយសារការដំឡើងពន្ធអាករក្នុងស្រុករបស់និយោជកនៅខែមេសា បន្តជំរុញឱ្យមានការចំណាយថ្លៃដើមខ្ពស់។

ស្ថាប័នពាណិជ្ជកម្មនៃសម្ព័ន្ធលក់រាយរបស់ចក្រភពអង់គ្លេស BRC បាននិយាយថា ការស្ទង់មតិរបស់ខ្លួនលើថ្នាក់ដឹកនាំហិរញ្ញវត្ថុនានានៅតាមហាងលក់រាយរួម ដែលតំណាងឱ្យអាជីវកម្មជាង ៩.០០០កន្លែង បានរកឃើញថា អត្រាអ្នកលក់រាយ ៨៥% បានដំឡើងតម្លៃនៅក្នុងអាជីវកម្មរបស់ពួកគេរួចទៅហើយ បន្ទាប់ពីរដ្ឋាភិបាលដំឡើងប្រាក់ឧបត្ថម្ភធានារ៉ាប់រងជាតិរបស់និយោជក និងប្រាក់ឈ្នួលអប្បបរមាជាតិ។

ទិន្នន័យបន្តថា អត្រាអ្នកហិរញ្ញវត្ថុ ៦៥% បានព្យាករពីកំណើនបន្ថែមទៀតនៃតម្លៃទំនិញយ៉ាងកប់ពពកក្នុងឆ្នាំ២០២៦ ខាងមុខ។ ទិន្នន័យផ្លូវការក្នុងខែនេះបង្ហាញថា អត្រាអតិផរណាតម្លៃទំនិញប្រើប្រាស់ប្រចាំឆ្នាំរបស់ចក្រភពអង់គ្លេស បានកើនឡើងដល់កម្រិតខ្ពស់បំផុតក្នុងពេលជាង ១ឆ្នាំពោលគឺ ៣,៦% ក្នុងខែមិថុនា ដោយគំរាមកំហែងថានឹងឡើងហួសពីការព្យាកររបស់ធនាគារកណ្ដាលអង់គ្លេស សម្រាប់កម្រិតកំពូលប្រហែល ៣,៧% ក្នុងខែកញ្ញា។

សម្ព័ន្ធ BRC ដែលតំណាងឱ្យអ្នកលក់រាយដ៏ធំបំផុតរបស់ចក្រភពអង់គ្លេស បានព្យាករថា អតិផរណាម្ហូបអាហារនឹងកើនឡើងដល់ ៦% នៅចុងឆ្នាំ២០២៥នេះ ដោយដាក់សម្ពាធបន្ថែមទៀតលើកញ្ចប់ថវិកាក្រុមគ្រួសារអង់គ្លេស ក្នុងពេលរហូតដល់បុណ្យណូអែលខាងមុខ៕