ក្រសួងការបរទេសរុស្ស៊ី បាននិយាយនៅក្នុងសេចក្តីថ្លែងការណ៍មួយថា អនុរដ្ឋមន្ត្រីការបរទេសរុស្ស៊ីលោក Sergey Vershinin និងបេសកជនពិសេសចិនសម្រាប់តំបន់មជ្ឈិមបូព៌ាលោក Zhai Jun បានបញ្ជាក់ជាថ្មីនៅក្នុងកិច្ចប្រជុំនៅទីក្រុងញូវយ៉ក អំពីសារៈសំខាន់នៃការបន្តការសម្របសម្រួល ដើម្បីសម្រេចបានបទឈប់បាញ់យូរអង្វែង នៅក្នុងទឹកដីប៉ាឡេស្ទីនដែលគ្រប់គ្រងដោយអ៊ីស្រាអែល។

សេចក្តីថ្លែងការណ៍បានឲ្យដឹងថា៖«ពួកគេបានអះអាងជាថ្មីអំពីសារៈសំខាន់នៃការបន្តការសម្របសម្រួល និងកិច្ចខិតខំប្រឹងប្រែងរួមគ្នារវាងទីក្រុងមូស្គូ និងទីក្រុងប៉េកាំង ក្នុងនាមជាសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ ឆ្ពោះទៅរកការសម្រេចបានបទឈប់បាញ់យូរអង្វែង នៅក្នុងទឹកដីប៉ាឡេស្ទីន ដោយធានាឲ្យមានជំនួយមនុស្សធម៌ប្រកបដោយសុវត្ថិភាព ទៅដល់អ្នកដែលកំពុងត្រូវការ និងចាប់ផ្តើមដំណើរការសន្តិភាពឡើងវិញ ដោយផ្អែកទៅលើមូលដ្ឋានច្បាប់ទទួលស្គាល់ជាសកល។

យោងតាមក្រសួងការបរទេស ភាគីទាំងពីរ បានផ្លាស់ប្តូរទស្សនៈអំពីស្ថានភាពបច្ចុប្បន្ន នៅក្នុងតំបន់ជម្លោះអារ៉ាប់-អ៊ីស្រាអែល និងនៅក្នុងតំបន់មជ្ឈិមបូព៌ាទាំងមូល។

ក្រសួងការបរទេសរុស្ស៊ី បានបញ្ជាក់ថា ភាគីទាំងពីរបានកត់សម្គាល់ថា មូលហេតុមួយក្នុងចំណោមមូលហេតុនៃអំពើហិង្សាកើតឡើងដដែលៗ និងវិបត្តិដែលមិនធ្លាប់មានពីមុនមក គឺបញ្ហាប៉ាឡេស្ទីនដែលមិនទាន់ដោះស្រាយរ៉ាំរ៉ៃ ការមិនយកចិត្តទុកដាក់ចំពោះសិទ្ធិស្របច្បាប់ និងសេចក្តីប្រាថ្នារបស់ប្រជាជនប៉ាឡេស្ទីន ក្នុងការមានរដ្ឋឯករាជ្យរបស់ខ្លួន នៅក្នុងព្រំដែនឆ្នាំ ១៩៦៧ ជាមួយទីក្រុងហ្ស៊េរុយសាឡឹមខាងកើត ជារដ្ឋធានីរបស់ខ្លួន ដោយមានទំនាក់ទំនងសន្តិហវិជ្ជមាន និងសន្តិសុខជាមួយអ៊ីស្រាអែល។

កិច្ចប្រជុំនេះ បានធ្វើឡើងនៅថ្ងៃទី ២៩ ខែកក្កដា នៅខាងក្រៅសន្និសីទអន្តរជាតិកម្រិតខ្ពស់ ក្នុងការគាំទ្រដំណោះស្រាយរដ្ឋពីរ ចំពោះជម្លោះប៉ាឡេស្ទីន-អ៊ីស្រាអែល។