ប្រធានអាជ្ញាធរប៉ាឡេស្ទីនលោក ម៉ាខ្មូដ អាបាស (Mahmoud Abbas) បានសម្តែងការដឹងគុណចំពោះប្រទេសដែលបានយល់ព្រមពិចារណាពីការទទួលស្គាល់រដ្ឋប៉ាឡេស្ទីន ហើយបាននិយាយថា ការទទួលស្គាល់បែបនេះ នឹងក្លាយជាជំហានប្រវត្តិសាស្ត្រមួយ ឆ្ពោះទៅរកសន្តិភាពនៅក្នុងតំបន់។

អាជ្ញាធរជាតិប៉ាឡេស្ទីន បាននិយាយនៅក្នុងសេចក្តីថ្លែងការណ៍មួយថា៖«លោកប្រធានអាជ្ញាធរនេះ បានវាយតម្លៃខ្ពស់ចំពោះជំហរដ៏អង់អាចរបស់បណ្តាប្រទេសជាមិត្ត ដែលបានបញ្ជាក់ឡើងវិញនូវការប្តេជ្ញាចិត្តរបស់ពួកគេ ចំពោះដំណោះស្រាយរដ្ឋទាំងពីរ និងសន្តិភាពដោយផ្អែកលើច្បាប់អន្តរជាតិ»។ លោក អាបាស បានសង្កត់ធ្ងន់ថា ការទទួលស្គាល់របស់ប្រទេសទាំងនេះចំពោះរដ្ឋប៉ាឡេស្ទីន ឬការប្រកាសត្រៀមខ្លួនក្នុងការទទួលស្គាល់នេះ គឺជំហានប្រវត្តិសាស្ត្រមួយ ឆ្ពោះទៅរកការសម្រេចបាននូវសន្តិភាពដ៏ត្រឹមត្រូវ និងទូលំទូលាយ និងពង្រឹងកិច្ចខិតខំប្រឹងប្រែងអន្តរជាតិ ដើម្បីបញ្ចប់ការកាន់កាប់របស់អ៊ីស្រាអែល។

លោក អាបាស បានសម្តែងការដឹងគុណចំពោះជំហរនេះ ហើយបានអំពាវនាវឲ្យប្រទេសផ្សេងទៀតចូលរួម និង «រួមចំណែកក្នុងការជំរុញដំណើរការនយោបាយ» ដោយផ្អែកលើគោលការណ៍នៃរដ្ឋពីរសម្រាប់ប្រជាជនពីរ។

នាពេលមុននេះ រដ្ឋមន្ត្រីការបរទេសមកពីប្រទេសចំនួន ១៥ បានគាំទ្រគំនិតនៃការពិចារណាអំពីលទ្ធភាពនៃការទទួលស្គាល់រដ្ឋប៉ាឡេស្ទីន បន្ទាប់ពីសន្និសីទស្តីពីបញ្ហានេះ ដែលបានធ្វើឡើង នៅទីក្រុងញូវយ៉ក។ សំណើនេះ ត្រូវបានគាំទ្រដោយរដ្ឋមន្ត្រីការបរទេសនៃប្រទេសអូស្ត្រាលី អង់ដូរ៉ា អៀរឡង់ អ៊ីស្លង់ អេស្ប៉ាញ កាណាដា លុចសំបួរ ម៉ាល់តា នូវែលសេឡង់ ន័រវែស ព័រទុយហ្គាល់ សាន់ម៉ារីណូ ស្លូវេនី ហ្វាំងឡង់ និង បារាំង។