ប្រធានាធិបតីអាមេរិក លោក Donald Trump កាលពីថ្ងៃពុធ (៣០ កក្កដា) បានដំឡើងពន្ធ ៥០% ជាផ្លូវការលើទំនិញប្រេស៊ីលភាគច្រើនចាប់ពីថ្ងៃទី០៦ ខែសីហា ខាងមុខនេះ ព្រោះតែអ្វីដែលលោកហៅថាជា "ការតាមទាញទម្លាក់ដ៏អាក្រក់" ប្រឆាំងនឹងអតីតប្រធានាធិបតីប្រេស៊ីល Jair Bolsonaro ប៉ុន្តែបានបន្ទន់ជំហរបន្តិចដោយការមិនរាប់បញ្ចូលវិស័យសំខាន់ៗដូចជាយន្តហោះ ថាមពល និងទឹកក្រូច ពីការយកពន្ធធ្ងន់ធ្ងរបែបនេះ។

លោក Trump បានប្រកាសពីពន្ធគយថ្មីនេះ ដែលជាតួលេខជ្រៅបំផុតមួយក្នុងសង្គ្រាមពាណិជ្ជកម្មរបស់សហរដ្ឋអាមេរិក ខណៈរដ្ឋបាលរបស់លោកក៏បានដាក់ទណ្ឌកម្មលើចៅក្រមតុលាការកំពូលប្រេស៊ីលមួយរូបផងដែរ ដែលត្រួតពិនិត្យរឿងក្តីរបស់លោក Bolsonaro លើបទចោទធ្វើរដ្ឋប្រហារ។

ក្រឹត្យដំឡើងពន្ធចុងក្រោយបង្អស់របស់លោក Trump និងការដាក់ទណ្ឌកម្មនេះ បានធ្វើឡើងបន្ទាប់ពីភាពរកាំរកូសជាច្រើនសប្តាហ៍ជាមួយលោកប្រធានាធីបតីប្រេស៊ីល Luiz Inacio Lula da Silva ដែលបានប្រដូចលោក Trump ទៅនឹង "អធិរាជ"។ លោក Lula កាលពីថ្ងៃពុធ បាននិយាយថា ប្រេស៊ីលមានឆន្ទៈក្នុងការចរចាពាណិជ្ជកម្មជាមួយសហរដ្ឋអាមេរិក ប៉ុន្តែក៏ព្រមានថាខ្លួននឹងមិនបោះបង់ចោលនូវវិធានការសងសឹកសម្រាប់ការពារខ្លួននោះទេ។

ក្រឹត្យរបស់លោក Trump បានផ្ដល់ភាពផ្លូវការលើពន្ធ ៥០% ដែលលោកបានគំរាមកំហែងប្រេស៊ីលយូរមកហើយ ប៉ុន្តែក្រឹត្យនេះមិនរាប់បញ្ចូលការនាំចេញសំខាន់ៗជាច្រើនរបស់ប្រេស៊ីលទៅកាន់អាមេរិកនោះទេ រួមទាំងយន្តហោះស៊ីវិល សមាសធាតុដែកឆៅ លោហៈធាតុដ៏មានតម្លៃ កម្ទេចឈើអាចម៍រណា ថាមពល និងជីកសិកម្មជាដើម៕