នាយករដ្ឋមន្ត្រីលីទុយអានី លោក Gintautas Paluckas បានសម្រេចលាលែងពីតំណែង បន្ទាប់ពីមានដំណើរការស៊ើបអង្កេត លើសកម្មភាពអាជីវកម្មរបស់លោក ដែលបានបណ្តាលឲ្យមានការតវ៉ានៅក្នុងរដ្ឋធានីរបស់ប្រទេសបាល់ទិកមួយនេះ ដោយអំពាវនាវឲ្យលោកលាលែងពីតំណែង។

ប្រធានាធិបតីរបស់ប្រទេសនេះ លោក Gitanas Nausėda បានប្រកាសពីការលាលែងពីតំណែងរបស់លោក Paluckas ទៅកាន់ប្រព័ន្ធផ្សព្វផ្សាយ នៅព្រឹកថ្ងៃព្រហស្បតិ៍ (ទី៣១ ខែកក្កដា) នេះ។

ហើយលោក Paluckas បានបញ្ជាក់ពីព័ត៌មាននេះនៅក្នុងសេចក្តីថ្លែងការណ៍មួយដែលចេញដោយគណបក្សសង្គមប្រជាធិបតេយ្យ (LSDP) របស់លោក។ លោក Paluckas បានឡើងកាន់តំណែងនេះ កាលពីចុងឆ្នាំមុន បន្ទាប់ពីរដ្ឋាភិបាលចម្រុះ ៣គណបក្ស ត្រូវបានបង្កើតឡើងក្រោយការបោះឆ្នោតសភា ក្នុងខែតុលា។

ការលាលែងរបស់លោក នាពេលនេះ ទំនងជាធ្វើឲ្យរដ្ឋាភិបាលទាំងមូលដួលរលំ ដោយគណៈរដ្ឋមន្ត្រីរបស់លោកត្រូវបានរំពឹងថា នឹងលាលែងពីតំណែងផងដែរ។ ការពិភាក្សាបង្កើតរដ្ឋាភិបាលចម្រុះថ្មី ត្រូវបានគេរំពឹងថា នឹងចាប់ផ្តើមក្នុងពេលឆាប់ៗនេះ។

លោក Paluckas បានប្រឈមនឹងរឿងអាស្រូវ ជុំវិញអាជីវកម្មរបស់លោក ក្នុងនោះរួមមានទាំងករណីខ្លះដែលបានកើតឡើងជាង ១ទសវត្សរ៍មុន។ ការស៊ើបអង្កេតដោយប្រព័ន្ធផ្សព្វផ្សាយ បានបង្ហាញថា រូបលោកមិនដែលបង់សោះឡើយនូវប្រាក់ផាកពិន័យចំនួន ១៦.៥០០អឺរ៉ូ (១.៩០០ដុល្លារ) បន្ទាប់ពីលោកត្រូវបានកាត់ទោសក្នុងឆ្នាំ២០១២ ពីបទប្រព្រឹត្តខុសលើដំណើរការដេញថ្លៃ សម្រាប់សេវាកម្មសម្លាប់សត្វកណ្ដុរ នៅរដ្ឋធានី Vilnius៕