ទីភ្នាក់ងារសារព័ត៌មានពាក់កណ្តាលផ្លូវការ Tasnim បានរាយការណ៍នៅថ្ងៃព្រហស្បតិ៍ (ទី៣១ ខែកក្កដា) នេះថា ប្រធានាធិបតីអ៊ីរ៉ង់ លោក Masoud Pezeshkian បានប្រាប់កុំឲ្យមានការប្រើប្រាស់ទឹកច្រើនហួសហេតុពេក ដែលលោកបាននិយាយថា ធ្វើឲ្យប្រទេសមិនអាចទប់ទល់បាន និងអាចនាំឲ្យទីក្រុងតេអេរ៉ង់ប្រឈមនឹងកង្វះខាតធ្ងន់ធ្ងរ នៅត្រឹមខែកញ្ញា។

ដោយប្រឈមមុខនឹងការគ្រប់គ្រងធនធានមិនត្រឹមត្រូវ និងការប្រើប្រាស់ហួសកម្រិត អ៊ីរ៉ង់បានជួបប្រទះជាថ្មីនូវការខ្វះខាតអគ្គិសនី ឧស្ម័ន និងទឹក ក្នុងកំឡុងពេលប៉ុន្មានខែដែលមានតម្រូវការខ្ពស់បំផុត។

លោក Pezeshkian បាននិយាយនៅថ្ងៃព្រហស្បតិ៍នេះថា៖ «នៅក្នុងទីក្រុងតេអេរ៉ង់ ប្រសិនបើយើងមិនអាចគ្រប់គ្រងបាន ហើយប្រជាជនមិនសហការក្នុងការគ្រប់គ្រងការប្រើប្រាស់ទេនោះ វានឹងមិនមានទឹកនៅក្នុងអាងស្តុកទុក ត្រឹមខែកញ្ញា ឬខែតុលា»។

គួរបញ្ជាក់ថា ប្រទេសនេះបានប្រឈមមុខនឹងស្ថានភាពគ្រោះរាំងស្ងួត ក្នុងរយៈពេល ៥ឆ្នាំចុងក្រោយនេះ ហើយបើយោងតាមនាយកអង្គការការពារបរិស្ថាន លោកស្រី Sheena Ansari និងស្ថាប័នឧតុនិយម បានឲ្យដឹងថា ការកត់ត្រា បានបង្ហាញពីការធ្លាក់ចុះទឹកភ្លៀង ៤០ភាគរយ ក្នុងរយៈពេល ៤ខែចុងក្រោយនេះ បើប្រៀបធៀបទៅនឹងមធ្យមភាគរយៈពេលវែង៕