នៅថ្ងៃព្រហស្បតិ៍នេះ ក្រុមសិទ្ធិមនុស្ស បានជំរុញប្រទេសនេប៉ាល់ឲ្យផ្លាស់ប្តូរបំរាមកម្មវិធីផ្ញើរសារលើបណ្តាញព័ត៌មានសង្គម Telegram ដោយពួកគេចាត់ទុកចំណាត់ការបែបនេះ គឺជាការគំរាមកំហែងធ្ងន់ធ្ងរមួយដល់សេរីភាពនៃការបញ្ចេញមតិ និងភាពឯកជនឌីជីថល ។

ប្រទេសនៅតំបន់ភ្នំហិម៉ាឡៃមួយនេះ បានប្លុកចោលការចូលដល់កម្មវិធី Telegram កាលពីថ្ងៃទី ១៨ ខែកក្កដាកន្លងទៅ ដោយលើកឡើងពីហេតុផលក្លែងបន្លំតាមអនឡាញ និងការលាងលុយកខ្វក់ ។

លោក Taranath Dahal មកពីក្រុម Freedom Forum ដែលជាក្រុមឃ្លាំមើលសេរីភាពសារព័ត៌មាន និយាយថា បំរាមរបស់រដ្ឋាភិបាលនេប៉ាល់ គឺជាការបំពានសិទ្ធិមនុស្សយ៉ាងធ្ងន់ធ្ងរ និងគឺជាការសម្រេចចិត្តរើសអើង ។

លោកបន្តថា នេះបង្ហាញថា រដ្ឋាភិបាលនេប៉ាល់ អាចហាមឃាត់វេទិកាណាមួយដោយគ្មានតម្លាភាព ដែលជាក្តីបារម្ភយ៉ាងធ្ងន់ធ្ងរ ។

ក្រុម Freedom Forum ស្ថិតក្នុងចំណោមអង្គការជាង ២០ ដែលបានចេញសេចក្តីថ្លែងការណ៍ទាមទារឲ្យមានការផ្លាស់ប្តូរជាបន្ទាន់លើបំរាមមួយនេះ ៕