រដ្ឋមន្ត្រីពាណិជ្ជកម្មរបស់ប្រទេសអូស្ត្រាលី លោក Don Farrell បានសម្ដែងក្ដីត្រេកអរ ដោយនិយាយនៅថ្ងៃសុក្រ (០១ សីហា) នេះថា សេតវិមានបានអះអាងថា ពុំមានប្រទេសណាមួយមានពន្ធគយបដិការទាបជាងប្រទេសអូស្ត្រាលី ទៀតនោះទេ ដោយលោកបានស្នើឱ្យប្រធានាធិបតីអាមេរិក លោក Donald Trump បន្តទុកពន្ធមូលដ្ឋាន ១០% នេះលើទំនិញអូស្ត្រាលី មិនឱ្យផ្លាស់ប្តូរ។

អ្នកនាំពាក្យរបស់លោក Farrell បាននិយាយនៅក្នុងសេចក្តីថ្លែងការណ៍មួយថា "ខណៈពេលដែលអូស្រា្តលីនៅតែស្ថិតក្នុងទីតាំងល្អបំផុតដែលអាចធ្វើទៅបានក្រោមរបបពន្ធថ្មីរបស់សហរដ្ឋអាមេរិក អូស្រា្តលីក៏នឹងបន្តស្វះស្វែងសម្រាប់ការដកពន្ធចេញទាំងអស់ ស្របតាមកិច្ចព្រមព្រៀងពាណិជ្ជកម្មសេរីរបស់អាមេរិក-អូស្រា្តលី"។

លោក Trump បានចុះហត្ថលេខាលើក្រឹត្យមួយកាលពីថ្ងៃព្រហស្បតិ៍ ដោយដាក់ពន្ធបដិការចាប់ពីអត្រា ១០% ទៅដល់ ៤១% លើប្រទេសរាប់សិប។ អូស្ត្រាលីគឺជាប្រទេសមួយក្នុងចំណោមប្រទេសមួយចំនួន ដែលសហរដ្ឋអាមេរិកជាធម្មតាមានអតិរេកពាណិជ្ជកម្ម ដោយនេះជាចំណុចមួយដែលជារឿយៗត្រូវបានលើកឡើងដោយមន្ត្រីអូស្ត្រាលី អំឡុងពេលកិច្ចពិភាក្សាពាណិជ្ជកម្មជាមួយមន្ត្រីសហរដ្ឋអាមេរិក។

ទិន្នន័យពីការិយាល័យតំណាងពាណិជ្ជកម្មអាមេរិកបង្ហាញថា អតិរេកពាណិជ្ជកម្មរបស់សហរដ្ឋអាមេរិក ជាមួយអូស្ត្រាលី មានចំនួន ១៧,៩ពាន់លានដុល្លារ ក្នុងឆ្នាំ២០២៤ កើនឡើង ១,៦% ពីឆ្នាំ២០២៣។ ពន្ធរបស់សហរដ្ឋអាមេរិកសម្រាប់ប្រទេសជិតខាងរបស់អូស្រា្តលី គឺនូវែលសេឡង់ ត្រូវបានដំឡើងដល់ ១៥% ពីកម្រិតមូលដ្ឋាន ១០% ដែលបានប្រកាសនៅក្នុងខែមេសា៕