សហរដ្ឋអាមេរិកនិងប្រទេសប៉ាគីស្ថាន បានបញ្ចប់ចុងក្រោយកិច្ចព្រមព្រៀងពាណិជ្ជកម្ម កាលពីថ្ងៃព្រហស្បតិ៍ ទី៣១ ខែកក្កដា ក្នុងគោលបំណងទម្លាក់ការដំឡើងពន្ធ និងបង្កើនការវិនិយោគក្នុងវិស័យសំខាន់ៗ រួមមានថាមពល បច្ចេកវិទ្យាព័ត៌មាន និងការរុករករ៉ែ។ ខណៈទីក្រុងអ៊ីស្លាម៉ាបាដ មិនបានបង្ហាញពីការកាត់បន្ថយការដំឡើងពន្ធជាក់លាក់ មន្ត្រីបាននិយាយថា កិច្ចព្រមព្រៀងនេះនឹងជួយបង្កើនទំនាក់ទំនងសេដ្ឋកិច្ច និងជួយប្រទេសប៉ាគីស្ថានប្រកួតប្រជែងជាមួយគូប្រជែងក្នុងតំបន់ដូចជាប្រទេសឥណ្ឌា និងវៀតណាម។

កិច្ចព្រមព្រៀងនេះ ធ្វើឡើងបន្ទាប់ពីការផ្អាកការដំឡើងពន្ធរបស់សហរដ្ឋអាមេរិកដ៏មានសក្ដានុពល ២៩%លើទំនិញរបស់ប៉ាគីស្ថាន ដោយប្រទេសនៅអាស៊ីខាងត្បូងមួយនេះស្វែងរកលក្ខខណ្ឌអំណោយផលបន្ថែមទៀតដើម្បីពង្រីកអតិរេកពាណិជ្ជកម្មចំនួន៣ពាន់លានដុល្លាររបស់ខ្លួនជាមួយសហរដ្ឋអាមេរិក ដែលភាគច្រើនត្រូវបានជំរុញដោយការនាំចេញវាយនភ័ណ្ឌ។

លោក Shahid Habib នាយកប្រតិបត្តិក្រុមហ៊ុន Arif Habib Securities Limited បានសាទរចំពោះកិច្ចព្រមព្រៀងនេះ ថាជា «ការផ្លាស់ប្តូរហ្គេម» សម្រាប់សេដ្ឋកិច្ចរបស់ប្រទេសប៉ាគីស្ថាន ដោយបានព្យាករពីកំណើនវិនិយោគរបស់សហរដ្ឋអាមេរិកលើផ្នែកថាមពល រ៉ែ និងបច្ចេកវិទ្យា។

លោក Habib បានសង្កត់ធ្ងន់លើសក្តានុពលសម្រាប់ក្រុមហ៊ុនអាមេរិកក្នុងការចូលទៅក្នុងទុនបម្រុងងប្រេង shale មិនទាន់បានអភិវឌ្ឍរបស់ប្រទេសប៉ាគីស្ថាន ដែលត្រូវបានប៉ាន់ប្រមាណថាមានចំនួន៩,១ ពាន់លានបារ៉ែល។ លោកក៏បានច្រានចោលការបារម្ភជុំវិញប្រតិកម្មរបស់ប្រទេសចិនដោយនិយាយថាទីក្រុងប៉េកាំង បានគាំទ្រជាប្រវត្តិសាស្ត្រដល់ការធ្វើពិពិធកម្មសេដ្ឋកិច្ចរបស់ប្រទេសប៉ាគីស្ថាន។ លោកបាននិយាយបន្ថែមថា «ប្រទេសចិនមិនប្រឆាំងប៉ាគីស្ថានដែលចូលរួមជាមួយដៃគូផ្សេងទៀតទេ ប្រទេសនេះចង់ឱ្យយើងរីកចម្រើន» ដោយលើកឡើងពីតួនាទីកិច្ចព្រមព្រៀងក្នុងការធ្វើឱ្យមានតុល្យភាពឡើងវិញនូវការពឹងផ្អែកផ្នែកពាណិជ្ជកម្មរបស់ទីក្រុងអ៊ីស្លាម៉ាបាដ។