មន្ត្រីបាននិយាយថា ប្រធានាធិបតីឥណ្ឌូនេស៊ី លោក Prabowo Subianto បានលើកលែងទោសដល់  គូប្រជែងនយោបាយពីររូប គឺអតីតរដ្ឋមន្ត្រីពាណិជ្ជកម្ម និងអ្នកនយោបាយជាន់ខ្ពស់ មកពីគណបក្សប្រឆាំងមួយ រយៈពេលពីរបីសប្តាហ៍ បន្ទាប់ពីអ្នកទាំងពីរ ត្រូវបានកាត់ទោសឲ្យជាប់ពន្ធនាគារ។

រដ្ឋមន្ត្រីនៃទីស្តីការគណៈរដ្ឋមន្ត្រី លោក Supratman Andi Agtas បាននិយាយកាលពីល្ងាចថ្ងៃព្រហស្បតិ៍ នៅក្នុងសន្និសីទសារព័ត៌មានមួយ ដែលផ្សាយដោយប្រព័ន្ធផ្សព្វផ្សាយក្នុងស្រុក បន្ទាប់ពីជួបជាមួយអនុប្រធានសភាថា លោក Prabowo បានផ្តល់ការលើកលែងទោសដល់លោក Hasto Kristiyanto អគ្គលេខាធិការនៃគណបក្សដ៏ធំបំផុតនៅក្នុងសភា គឺគណបក្សតស៊ូដើម្បីប្រជាធិបតេយ្យឥណ្ឌូនេស៊ី(PDIP) ។

លោក Hasto ត្រូវបានកាត់ទោសឲ្យពន្ធនាគារ ៣ឆ្នាំកន្លះ កាលពីសប្តាហ៍មុន ពីបទសូកប៉ាន់មន្ត្រីបោះឆ្នោត ប៉ុន្តែការលើកលែងទោស បានលុបចោលការកាត់ទោសរបស់លោក ទោះបីជាការផ្តន្ទាទោសរបស់លោកនឹងនៅតែមានក្តី។

លោក Supratman បាននិយាយនៅក្នុងសន្និសីទសារព័ត៌មានថា លោកប្រធានាធិបតី ក៏បានផ្តល់ការលុបចោលទោសសម្រាប់លោក Thomas Trikasih Lembong ដែលជារដ្ឋមន្ត្រីពាណិជ្ជកម្ម ក្រោមការដឹកនាំរបស់អតីតប្រធានាធិបតីលោក Joko Widodo ដែលត្រូវបានកាត់ទោសឲ្យជាប់ពន្ធនាគារ ៣ឆ្នាំកន្លះ ពីបទការផ្តល់ការអនុញ្ញាតឲ្យនាំចូលស្ករសមិនត្រឹមត្រូវ។

ការលុបចោលទោសនេះ មានន័យថា លោក Lembong ដែលជាអ្នកគ្រប់គ្រងយុទ្ធនាការរបស់បេក្ខជនប្រកួតប្រជែងរបស់លោក Prabowo ក្នុងការបោះឆ្នោតប្រធានាធិបតីកាលពីឆ្នាំមុន ត្រូវបានរួចផុតពីការចោទប្រកាន់ និងការជាប់ទោសរបស់លោក។