អភិបាលរដ្ឋ New Jersey លោកស្រី Kathy Hochul និងសមភាគីរដ្ឋ New Jersey ស្តីទីរបស់លោកស្រី បានប្រកាសដាក់រដ្ឋក្នុងភាពអាសន្ន សម្រាប់តំបន់ដែលប្រឈមនឹងការគំរាមកំហែងពីការមានទឹកជំនន់គំហុកភ្លាមៗ កាលពីថ្ងៃព្រហស្បតិ៍ (ទី៣១ ខែកក្កដា) ដោយសារភ្លៀងធ្លាក់ខ្លាំង ដែលរំខានដល់ការធ្វើដំណើរតាមផ្លូវដែក និងផ្លូវអាកាសតាមបណ្តោយឆ្នេរភាគខាងកើតសហរដ្ឋអាមេរិក។

សេវាអាកាសធាតុជាតិ បានបង្ហោះការព្រមាន អំពីការមានទឹកជំនន់គំហុកភ្លាមៗ នៅតាមផ្នែកខ្លះនៃច្រករបៀងទីក្រុងភាគឦសានដែលលាតសន្ធឹងពីតំបន់ Washington-Baltimore ភាគខាងជើង កាត់តាមទីក្រុង Philadelphia, Wilmington, Delaware ហើយចូលទៅកាន់ទីក្រុង Newark រដ្ឋ New Jersey និងតំបន់ទីប្រជុំជននៃទីក្រុង New York។

ព្យុះផ្គររន្ទះខ្លាំងក៏មានឥទ្ធិពលផងដែរនៅទូទាំងតំបន់ភាគច្រើននៃច្រករបៀង Interstate-95 ប៉ុន្តែអ្នកព្យាករណ៍បានប្រាប់ថា ហានិភ័យទឹកជំនន់កំពុងចាប់ផ្តើមថយចុះ កាលពីយប់ថ្ងៃទី៣១ ខែកក្កដា។ អាកាសធាតុមានព្យុះ ហាក់ដូចជាកត្តាសំខាន់ដែលរំខានដល់ការធ្វើដំណើរតាមផ្លូវអាកាសពាណិជ្ជកម្មឆ្លងកាត់ភាគខាងជើងឆៀងខាងកើត កាលពីថ្ងៃទី៣១ ខែកក្កដានោះ។

យោងតាមសេវាតាមដានជើងហោះហើរអនឡាញ FlightAware បានឲ្យដឹងថា អាកាសយានដ្ឋានសំខាន់ៗចំនួន ៨ ដែលបម្រើសេវាក្នុងតំបន់ ត្រូវលុបចោលជើងហោះហើរយ៉ាងហោចណាស់ ១.១៧០វ៉ុល ជាជើងហោះហើរចូល ចេញ ឬក្នុងរង្វង់សហរដ្ឋអាមេរិក។ ការធ្វើដំណើរតាមរថភ្លើង ក៏ត្រូវបានរំខានផងដែរ។

យោងតាមសេចក្តីថ្លែងការណ៍របស់លោកស្រី Hochul បានឲ្យដឹងថា កម្រិតទឹកភ្លៀងរហូតដល់ ១២,៧ សង់ទីម៉ែត្រ ត្រូវបានព្យាករថា នឹងមាននៅទូទាំងរដ្ឋទីក្រុង New York កោះ Long Island និងជ្រលងទន្លេ Hudson ដោយមានអត្រាទឹកភ្លៀងដែលអាចលើសពី ៥សង់ទីម៉ែត្រក្នុងមួយម៉ោង៕