ក្រុមសេដ្ឋវិទូព្រមានថា ពន្ធថ្មីរបស់សហរដ្ឋអាមេរិកលើទីផ្សារសាកលលោកដែលចូលជាធរមាននៅថ្ងៃទី ១ ខែសីហានេះ អាចធ្វើឲ្យប៉ះពាល់ដល់កំពង់ផែ Mombasa របស់ប្រទេសកេនយ៉ា ។

កំពង់ផែ Mombasa ដែលប្រតិបត្តិការដោយអាជ្ញាធរកំពង់ផែកេនយ៉ា គឺជាច្រកចូលដ៏សំខាន់មួយរបស់ប្រទេសមួយនេះ សម្រាប់វត្ថុធាតុដើមនាំចូល និងគ្រឿងម៉ាស៊ីន រួមទាំងកំណាត់ និងថ្នាំជ្រលក់ ។ វាគ្រប់គ្រងការដឹកញ្ជូនសម្លៀកបំពាក់ទៅក្រៅប្រទេសផងដែរ ។

អាជ្ញាធរតំបន់ដំណើរការនាំចេញរាយការណ៍ថា កេនយ៉ា បាននាំចេញសម្លៀកបំពាក់ និងវាយនភណ្ឌតម្លៃជាង ៥៤០លានដុល្លារ ក្នុងឆ្នាំ ២០២៤ ក្នុងនោះជាង ៩០ភាគរយ នាំចេញទៅកាន់សហរដ្ឋអាមេរិក ក្រោមច្បាប់ឱកាស និងកំណើនអាហ្វ្រិក(AGOA)។

វិស័យមួយនេះ បានជួលកម្មករជាង ៦៦.០០០នាក់នៅតំបន់ដំណើរការនាំចេញ ដោយមជ្ឈមណ្ឌលឧស្សាហកម្មជាច្រើនស្ថិតនៅទីក្រុង Nairobi, Athi River និងទីក្រុង Mombasa ។

ច្បាប់ AGOA នឹងត្រូវផុតកំណត់នៅខែកញ្ញាខាងមុខនេះ គាប់ជួននឹងពន្ធថ្មី ១០ភាគរយលើការនាំចេញទំនិញកេនយ៉ា ក្រោមការផ្លាស់ប្តូរគោលនយោបាយពាណិជ្ជកម្មសហរដ្ឋអាមេរិកដាក់ចេញដោយលោកប្រធានាធិបតី Donald Trump ។

កំពង់ផែ Mombasa បម្រើផលប្រយោជន៍ដល់ប្រទេសជិតខាង អ៊ូហ្គង់ដា រ៉្វាន់ដា និងស៊ូដង់ខាងត្បូងផងដែរ ៕