ប្រទេសរ៉្វាន់ដា និងសាធារណរដ្ឋប្រជាធិបតេយ្យកុងហ្គោ បានបើកកិច្ចប្រជុំលើកដំបូងនៃគណៈកម្មាធិការត្រួតពិនិត្យរួមមួយ កាលពីថ្ងៃព្រហស្បតិ៍ (ទី៣១ ខែកក្កដា) ដោយបានបោះជំហានឆ្ពោះទៅរកការអនុវត្តកិច្ចព្រមព្រៀងសន្តិភាពដែលបានឈានដល់ កាលពីខែមិថុនា នៅទីក្រុងវ៉ាស៊ីនតោន សហរដ្ឋអាមេរិក ទោះបីជាការប្តេជ្ញាចិត្តផ្សេងទៀតមិនទាន់ត្រូវបានបំពេញក៏ដោយ។

សហភាពអាហ្រ្វិក កាតា និងសហរដ្ឋអាមេរិក បានចូលរួមកិច្ចប្រជុំគណៈកម្មាធិការនេះ នៅទីក្រុងវ៉ាស៊ីនតោន ដែលត្រូវបានបង្កើតឡើងជាវេទិកាដោះស្រាយការអនុវត្ត និងស្វែងរកដំណោះស្រាយនៃកិច្ចព្រមព្រៀងសន្តិភាព។

កិច្ចព្រមព្រៀងកាលពីខែមិថុនា រវាងប្រទេសរ៉្វាន់ដា និងកុងហ្គោ បានបង្ហាញពីជោគជ័យ ក្នុងកិច្ចពិភាក្សាដែលធ្វើឡើងដោយរដ្ឋបាលរបស់ប្រធានាធិបតីអាមេរិក លោក Donald Trump ដែលមានបំណងបញ្ចប់ការប្រយុទ្ធគ្នាដែលបានសម្លាប់មនុស្សរាប់ពាន់នាក់ និងទាក់ទាញការវិនិយោគរបស់លោកខាងលិចតម្លៃរាប់ពាន់លានដុល្លារទៅកាន់តំបន់សម្បូរទៅដោយសារធាតុ Tantalum មាស Cobalt ទង់ដែង លីចូម និងធានធានរ៉ែផ្សេងទៀត។

រយៈពេល ៣០ថ្ងៃក្រោយការចុះហត្ថលេខា បានកន្លងផុតទៅដោយគ្មានកិច្ចប្រជុំនៃយន្តការសម្របសម្រួលសន្តិសុខរួម ហើយប្រតិបត្តិការដែលផ្តោតលើ FDLR (កងកម្លាំងប្រជាធិបតេយ្យ សម្រាប់ការរំដោះរ៉្វាន់ដា) និងការដកទាហានរ៉្វាន់ដា ដែលជាផ្នែកនៃកិច្ចព្រមព្រៀង មិនទាន់ចាប់ផ្តើមនៅឡើយទេ។

តែយ៉ាងណាក្ដី កិច្ចប្រជុំគណៈកម្មាធិការត្រួតពិនិត្យរួម ដែលគ្រោងនឹងជួបក្នុងរយៈពេល ៤៥ថ្ងៃ បន្ទាប់ពីការចុះហត្ថលេខានោះ បានប្រព្រឹត្តទៅតាមកាលវិភាគ៕