នៅទូទាំងតំបន់អាស៊ី-ប៉ាស៊ីហ្វិក ដៃគូពាណិជ្ជកម្មរបស់សហរដ្ឋអាមេរិកកំពុងរក​មធ្យោបាយ​ដោះ​ស្រាយ​នឹង​ការដំឡើងពន្ធលើការនាំចូលចុងក្រោយ ដែលត្រូវបានដាក់ដោយលោកប្រធានាធិបតី Donald Trump។ ប្រភពព័ត៌មានពីរដ្ឋាភិបាលឥណ្ឌាបានប្រាប់សារព័ត៌មានរ៉យទ័រកាលពីថ្ងៃសុក្រថា នៅក្នុង​ប្រទេស​ឥណ្ឌា ការនាំចេញដែលមានតម្លៃជិត៤០ពាន់លានដុល្លារអាចរងផលប៉ះពាល់ បន្ទាប់ពី​ប្រទេស​មាន​សេដ្ឋកិច្ច​ធំបំផុតទី៥របស់ពិភពលោកមួយនេះត្រូវបានផ្តល់អត្រាដំឡើងពន្ធ២៥% ។

ប្រភព​ដដែលបានបន្តថា ប្រទេសនេះកំពុងពិភាក្សាពាណិជ្ជកម្មជាមួយសហរដ្ឋអាមេរិក។ ប៉ុន្តែ​បើ​គ្មាន​កិច្ចព្រមព្រៀងអត្រាពន្ធសម្រាប់លក្ខខណ្ឌពាណិជ្ជកម្ម វាអាច​បំផ្លាញ​សេដ្ឋកិច្ច​ដៃគូ​យុទ្ធ​សាស្ត្រ​របស់​សហរដ្ឋអាមេរិកនៅអាស៊ីមួយនេះ។

អគ្គលេខាធិការក្រុមប្រឹក្សាជំរុញការនាំចេញសម្លៀកបំពាក់ លោក Mithileshwar Thakur បាននិយាយថា ការដំឡើងពន្ធគយនេះមិនស្របច្បាប់ទេ។ នៅពេលដែលអ្នកជាសមាជិកអង្គការពាណិជ្ជកម្មពិភពលោក(WTO) អ្នកចរចាអំពីការដំឡើងពន្ធតាមកិច្ចព្រមព្រៀងពន្ធWTO ដូច្នេះអ្នកមិនអាចឲ្យលើសពីពន្ធនេះទេ។ ការដំឡើងពន្ធបដិការនេះ មិនបានគោរពតាមគោលការណ៍ឡើយ។

ក្រឹត្យថ្មីរបស់លោក Trump ក៏រួមមានពន្ធ២០% សម្រាប់កោះតៃវ៉ាន់ផងដែរ។ រដ្ឋាភិបាលកោះតៃវ៉ាន់បាននិយាយថា អត្រាពន្ធរបស់ខ្លួនគឺ «បណ្តោះអាសន្ន» ហើយខ្លួនរំពឹងថានឹងឈានដល់តួលេខទាបជាងនេះ។ ប្រទេសអាស៊ីខាងត្បូង និងអាស៊ីអាគ្នេយ៍មួយចំនួន អាចបង្ហាញពីភាពធូរស្រាល។