អភិបាលតំបន់បានឲ្យដឹងនៅថ្ងៃសៅរ៍ (ទី២ ខែសីហា) នេះថា ការវាយប្រហារ នាពេលយប់ ដោយយានដ្រូនរបស់អ៊ុយក្រែន បានបណ្ដាលឲ្យមនុស្ស ៣នាក់ស្លាប់ និងរបួស ២នាក់ផ្សេងទៀត នៅភាគខាងលិចនៃប្រទេសរុស្ស៊ី។

អភិបាលតំបន់លោក Oleg Melnichenko បានឲ្យដឹងនៅលើកម្មវិធីផ្ញើសារ Telegram ថា ស្ត្រីម្នាក់បានបាត់បង់ជីវិត ហើយ ២នាក់ផ្សេងទៀតបានរងរបួស អំឡុងការវាយប្រហារលើសហគ្រាស នៅក្នុងតំបន់ Penza។

ហើយយោងតាមអភិបាលតំបន់មួយរូបទៀត គឺលោក Vyacheslav Fedorishchev បានប្រាប់ថា បុរសចំណាស់ម្នាក់ បានស្លាប់ បន្ទាប់ពីបំណែកយានដ្រូន បានបង្កឲ្យមានអគ្គិភ័យឆាបឆេះផ្ទះ ១ខ្នង នៅក្នុងតំបន់ Samara។ អភិបាលតំបន់ស្តីទី លោក Yuri Sliusar បាននិយាយថា នៅក្នុងតំបន់ Rostov សន្តិសុខមា្នក់ នៅរោងចក្រឧស្សាហកម្មមួយ ត្រូវបានសម្លាប់ បន្ទាប់ពីមានការវាយប្រហារដោយយានដ្រូន និងការបាញ់ប្រហារ។

ចំណែកក្រសួងការពារជាតិរុស្ស៊ី បានឲ្យដឹងថា ប្រព័ន្ធការពារដែនអាកាសរបស់ខ្លួន បានបាញ់ទម្លាក់យានដ្រូនរបស់អ៊ុយក្រែនចំនួន ១១២គ្រឿង នៅលើដែនដីរុស្ស៊ី នាចន្លោះយប់ថ្ងៃសុក្រ និងព្រឹកថ្ងៃសៅរ៍នេះ ក្នុងនោះរួមទាំង ៣៤គ្រឿង នៅតំបន់ Rostov ផងដែរ៕