ប្រទេសចិនបានជូនដំណឹងជាថ្មីអំពីអាកាសធាតុ នៅថ្ងៃសៅរ៍ (ទី២ ខែសីហា) នេះ ដោយព្រមានអំពីព្យុះភ្លៀង និងសីតុណ្ហភាពឡើងក្ដៅខ្លាំង នៅក្នុងតំបន់មួយចំនួន។

មជ្ឈមណ្ឌលឧតុនិយមជាតិ (NMC) បានរក្សាការជូនដំណឹងពណ៌លឿង អំពីការមានព្យុះភ្លៀង ដោយព្យាករថា នឹងមានភ្លៀងធ្លាក់ខ្លាំង ចាប់ពីថ្ងៃទី២ ដល់ថ្ងៃទី៣ ខែសីហា នៅទូទាំងផ្នែកខ្លះនៃតំបន់ម៉ុងហ្គោលីខាងក្នុង (Inner Mongolia), Heilongjiang, Jilin, Liaoning, Shanxi, Hebei រដ្ឋធានីប៉េកាំង Tianjin, Jiangsu, Shanghai, Zhejiang, Anhui, Jiangxi, Fujian, Guangdong, Guangxi, Yunnan និងកោះតៃវ៉ាន់។

យោងតាម NMC បានឲ្យដឹងថា តំបន់មួយចំនួននៃតំបន់ទាំងនេះ អាចជួបប្រទះនឹងភ្លៀងធ្លាក់ ក្នុងមួយម៉ោងលើសពី ៧០មីលីម៉ែត្រ អមដោយផ្គររន្ទះ និងខ្យល់ខ្លាំង។

រដ្ឋបាលក្នុងតំបន់ ត្រូវបានជំរុញឲ្យមានការប្រុងប្រយ័ត្នជាចាំបាច់ និងពិនិត្យមើលប្រព័ន្ធលូ ក្នុងទីក្រុង ដីស្រែ និងអាងចិញ្ចឹមត្រី។ ហើយជាមួយគ្នានេះ NMC ក៏បានបន្តការជូនដំណឹងពណ៌លឿង សម្រាប់សីតុណ្ហភាពឡើងក្ដៅខ្លាំង នៅក្នុងតំបន់ជាច្រើនផងដែរ។

NMC បានបន្ថែមថា សីតុណ្ហភាពនៅផ្នែកខ្លះនៃតំបន់ Shaanxi, Sichuan, Chongqing និង Turpan Basin ក្នុងតំបន់ Xinjiang អាចលើសពី ៤០អង្សាសេ។ មជ្ឈមណ្ឌលនេះបានណែនាំដល់ប្រជាពលរដ្ឋឲ្យមានវិធានការការពារ និងចៀសវាងកុំនៅក្រោមពន្លឺព្រះអាទិត្យយូរពេក៕