មន្ត្រីគ្រប់គ្រងគ្រោះមហន្តរាយ នាថ្ងៃសៅរ៍ (ទី២ ខែសីហា) នេះ បានឲ្យដឹងថា ទឹកជំនន់ និងបំណាក់ដីដែលបង្កឡើងដោយព្យុះត្រូពិក Wipha តាំងពីខែមុន បានបណ្ដាលឲ្យមនុស្សយ៉ាងហោចណាស់ ៦នាក់ស្លាប់ និងប៉ះពាល់ដល់ជាង ២៣០.០០០នាក់ផ្សេងទៀត នៅទូទាំងប្រទេសថៃ។

ចាប់តាំងពីថ្ងៃទី២១ ខែកក្កដាមក ភ្លៀងធ្លាក់ខ្លាំងបានបង្កជាទឹកជំនន់នៅខេត្តចំនួន ១២ ដែលភាគច្រើននៅតំបន់ភាគខាងជើង និងភាគកណ្តាល។ នេះបើយោងតាមការឲ្យដឹងពីនាយកដ្ឋានបង្ការ និងកាត់បន្ថយគ្រោះមហន្តរាយរបស់ថៃ។

តាមរយៈសេចក្តីថ្លែងការណ៍ នៅលើទំព័របណ្ដាញសង្គម Facebook ផ្លូវការរបស់ខ្លួន ទីភ្នាក់ងារនេះ បានឲ្យដឹងថា៖ «យើងកំពុងតាមដានយ៉ាងដិតដល់នូវផលប៉ះពាល់ ដោយសារព្យុះភ្លៀង Wipha និងកំពុងសម្របសម្រួលជាមួយបណ្ដាខេត្តដែលរងផលប៉ះពាល់ ដើម្បីជួយអ្នកដែលត្រូវការជំនួយ»។

រូបភាពនៅលើបណ្ដាញសង្គម បានបង្ហាញឲ្យឃើញទឹកជំនន់ដ៏អាក្រក់ បាវខ្សាច់តម្រៀបគរគ្នា នៅខាងក្រៅផ្ទះសម្បែង ហើយអ្នកស្រុកប្រើប្រាស់ទូកតូចៗ ដើម្បីធ្វើដំណើរលើផ្លូវដែលលិចទឹក។ តែយ៉ាងណាក្តី នាយកដ្ឋានឧតុនិយមនៃព្រះរាជាណាចក្រមួយនេះ ព្យាករថា ភ្លៀងធ្លាក់នឹងថមថយ ក្នុងរយៈពេលប៉ុន្មានថ្ងៃខាងមុខនេះ៕