សារព័ត៌មាន New York Times (NYT) នៅថ្ងៃសៅរ៍ (ទី២ ខែសីហា) នេះ បានរាយការណ៍ថា មន្ត្រីឥណ្ឌាបានប្រាប់ថា ប្រទេសរបស់ខ្លួននឹងបន្តទិញប្រេងពីប្រទេសរុស្ស៊ីដដែល បើទោះបីជាមានការគំរាមកំហែងដាក់ទណ្ឌកម្មពីប្រធានាធិបតីអាមេរិកលោក Donald Trump ក៏ដោយ។

សារព័ត៌មាន Reuters មិនអាចផ្ទៀងផ្ទាត់របាយការណ៍នេះបានភ្លាមៗឡើយ។ ហើយសេតវិមាន ក្រសួងការបរទេស និងក្រសួងប្រេងកាត និងឧស្ម័នធម្មជាតិរបស់ឥណ្ឌា ក៏មិនបានឆ្លើយតបភ្លាមៗនោះដែរ ចំពោះសំណើសុំការអត្ថាធិប្បាយ។

លោក Trump កាលពីខែមុន បានបង្ហាញនៅក្នុងការបង្ហោះលើបណ្ដាញសង្គម Truth Social ថា ឥណ្ឌានឹងប្រឈមជាមួយនឹងការពិន័យបន្ថែម ជុំវិញការទិញអាវុធ និងប្រេងពីរុស្ស៊ី។ តែក្រោយមក លោកបាននិយាយថា លោកមិនខ្វល់ពីអ្វីដែលឥណ្ឌាធ្វើជាមួយនឹងរុស្ស៊ីនោះទេ។

ហើយកាលពីថ្ងៃសុក្រ (ទី១ ខែសីហា) លោក Trump បានប្រាប់អ្នកសារព័ត៌មានថា លោកបានឮថា ឥណ្ឌានឹងលែងទិញប្រេងពីរុស្ស៊ីទៀតហើយ។ តែបើយោងតាមសេចក្ដីរាយការណ៍របស់សារព័ត៌មាន NYT បានឲ្យដឹងថា មន្ត្រីជាន់ខ្ពស់ឥណ្ឌា ២រូប បានបង្ហើបថា មិនមានការផ្លាស់ប្តូរគោលនយោបាយនោះទេ ហើយសារព័ត៌មាននេះបានបន្ថែមទៀតថា មន្ត្រីម្នាក់បានប្រាប់ថា រដ្ឋាភិបាល «មិនបានផ្តល់ទិសដៅណាមួយដល់ក្រុមហ៊ុនប្រេង» ដើម្បីឲ្យកាត់បន្ថយការនាំចូលពីប្រទេសរុស្ស៊ីនោះឡើយ៕