នាយកដ្ឋានបង្ការ និងកាត់បន្ថយគ្រោះមហន្តរាយរបស់ប្រទេសថៃ (DDPM) បន្តតាមដានស្ថានភាពទឹកជំនន់ក្នុងខេត្តចំនួនបួន ខណៈកំពុងពន្លឿនកិច្ចខិតខំប្រឹងប្រែងស្តារឡើងវិញ បន្ទាប់ពីមានការបំផ្លិចបំផ្លាញបង្កឡើងដោយព្យុះត្រូពិក Wipha ដែលបានឆក់យកជីវិតមនុស្សចំនួន ៦ នាក់ និងប៉ះពាល់ដល់មនុស្សជាង៧៤.០០០គ្រួសារ។

នៅក្នុងកិច្ចប្រជុំត្រួតពិនិត្យស្ថានភាពដែលបានធ្វើឡើងកាលពីព្រឹកថ្ងៃសៅរ៍ ក្រុមមន្ត្រីនៃទីភ្នាក់ងារគ្រោះមហន្តរាយបានបញ្ជាក់ថា ទឹកជំនន់នៅតែបន្តកើតមាននៅក្នុងខេត្ត Nan, Chiang Rai, Sukhothai និង Phitsanulok ទោះបីជាកម្រិតទឹកបានស្រកក៏ដោយ។ 

ប្រធាននាយកដ្ឋានបង្ការ និងកាត់បន្ថយគ្រោះមហន្តរាយរបស់ប្រទេសថៃ លោក Passakorn Boonyalak បានបង្ហាញថា ព្យុះ Wipha បានបង្កឲ្យមានទឹកជំនន់ និងបំណាក់ដីនៅទូទាំងខេត្តចំនួន ១២ចាប់ពីថ្ងៃទី ២១ ខែកក្កដា ដល់ថ្ងៃទី ២ខែសីហា ឆ្នាំ២០២៥នេះ។

គ្រោះមហន្តរាយនេះបានប៉ះពាល់ដល់ស្រុកចំនួន ៧៤ សង្កាត់ចំនួន ៣៦៤ និងភូមិចំនួន២.៣៨៧ ប៉ះពាល់ដល់គ្រួសារចំនួន ៧៤.៥៩៧ ឬប្រហែល ២៣៣.៥០៩ នាក់ ។អ្នកស្លាប់ចំនួន៦នាក់ត្រូវបានកត់ត្រាក្នុងអំឡុងពេលនោះ។

គួររម្លឹកថាទឹកជំនន់ដ៏ធំនៅទូទាំងប្រទេសថៃក្នុងឆ្នាំ២០១១ បានសម្លាប់មនុស្សជាង ៥០០ នាក់ និងបំផ្លាញលំនៅឋានរាប់លានខ្នងនៅទូទាំងប្រទេស៕