យោងតាមទីភ្នាក់ងារអាកាសធាតុរបស់ប្រទេសប្រទេសជប៉ុន បានឲ្យដឹងថា ប្រទេសនេះបានជួបប្រទះនូវខែកក្កដាដ៏ក្តៅបំផុតរបស់ខ្លួនសម្រាប់ឆ្នាំទី ៣ ជាប់ៗគ្នា ដោយតំបន់ជាច្រើននៅទូទាំងប្រទេសមានភ្លៀងធ្លាក់តិចជាង ១០ ភាគរយនៃកម្រិតធម្មតា ដែលជះឥទ្ធិពលយ៉ាងធ្ងន់ធ្ងរដល់ផលិតកម្មស្រូវ។

ទីភ្នាក់ងារឧតុនិយមជប៉ុន (JMA) បាននិយាយកាលពីថ្ងៃសុក្រថា សីតុណ្ហភាពជាមធ្យមទូទាំងប្រទេសគឺខ្ពស់បំផុតសម្រាប់ខែកក្កដា ឬខ្ពស់ជាងធម្មតា២,៨៩ អង្សាសេ ចាប់តាំងពីកំណត់ត្រាដែលអាចប្រៀបធៀបបាន បានចាប់ផ្តើមកាលពីឆ្នាំ១៨៩៨ ដោយបានលុបលើកំណត់ត្រាកន្លងទៅ ដែលបានកំណត់ក្នុងឆ្នាំ២០២៤  ក្នុងកម្រិត២,១៦១ អង្សាសេ។

ក្រុមមន្ត្រីអាកាសធាតុបាននិយាយថា គម្លាតនៅឆ្នាំនេះខុសពីធម្មតាគឺច្រើនជាងតួលេខកាលពីកន្លងទៅ ដោយបន្ថែមថាប្រទេសនេះប្រឈមនឹងសីតុណ្ហភាពខ្ពស់ខុសធម្មតា ។  

កាលពីថ្ងៃទី៣០ ខែកក្កដា សីតុណ្ហភាពកម្រិត៤១,២ អង្សាត្រូវបានកត់ត្រានៅទីក្រុង Tamba ក្នុងខេត្តភាគខាងលិច Hyogo ដែលជាកម្រិតខ្ពស់បំផុតមិនធ្លាប់មាននៅក្នុងប្រទេសនេះ។ នៅថ្ងៃទី ២៤ ខែកក្កដា កម្ដៅបានកើនឡើងដល់ជិត ៤០ អង្សា នៅក្នុងផ្នែកខ្លះនៃខេត្តភាគខាងជើងរបស់កោះហុកកៃដូ (Hokkaido)។ 

លើសពីនេះ មានទីតាំងចំនួន ៤.៥៦៥ នៅទូទាំងប្រទេសជប៉ុនបានជួបប្រទះសីតុណ្ហភាពលើសពី ៣៥ អង្សាសេ ជាចំនួនខ្ពស់បំផុតចាប់តាំងពីទិន្នន័យដែលអាចប្រៀបធៀបបាន បានចាប់ផ្តើមក្នុងឆ្នាំ ២០១០៕