ទូរទស្សន៍រដ្ឋ Ekhbariya បានរាយការណ៍កាលពីថ្ងៃអាទិត្យ ទី៣ សីហាថា ក្រុមប្រដាប់អាវុធ បានវាយប្រហារបុគ្គលិកមកពីកងកម្លាំងសន្តិសុខផ្ទៃក្នុងរបស់ប្រទេសស៊ីរីក្នុងទីក្រុង Sweida ដោយបានសម្លាប់សមាជិកម្នាក់ និងធ្វើឲ្យរងរបួសច្រើននាក់ផ្សេងទៀត ព្រមទាំងបានបាញ់ផ្លោងទៅលើភូមិមួយចំនួនក្នុងខេត្តភាគខាងត្បូងដែលរងការវាយប្រហារដោយអំពើហិង្សា។

សេចក្តីរាយការណ៍នេះ បានដកស្រង់ប្រភពសន្តិសុខដោយនិយាយថា ក្រុមប្រដាប់អាវុធបានរំលោភលើបទឈប់បាញ់ដែលបានព្រមព្រៀងគ្នានៅក្នុងតំបន់ជនជាតិភាគតិច Druze ជាទីដែលមនុស្សរាប់រយនាក់ត្រូវបានសម្លាប់កាលពីខែមុន។ អំពើហិង្សាបានផ្ទុះឡើងនៅទីក្រុង Sweida កាលពីថ្ងៃទី១៣ ខែកក្កដា រវាងក្រុមអ្នកប្រយុទ្ធកុលសម្ព័ន្ធ និងក្រុមជនជាតិភាគតិច Druze ។ កងកម្លាំងរដ្ឋាភិបាល ត្រូវបានបញ្ជូនទៅបង្ក្រាបការប្រយុទ្ធគ្នា ប៉ុន្តែការបង្ហូរឈាមកាន់តែធ្ងន់ធ្ងរឡើង។

ជនជាតិភាគតិច Druze គឺជាអំបូរជនជាតិភាគតិចឥស្លាមដោយមានអ្នកដើរតាមនៅក្នុងប្រទេសស៊ីរី លីបង់ និងប្រទេសអ៊ីស្រាអែល។ ទីក្រុង Sweida មានជនជាតិភាគតិចDruze ច្រើនលើសលុប ប៉ុន្តែក៏ជាទីជម្រករបស់ក្រុមកុលសម្ព័ន្ធស៊ុននីផងដែរ ហើយសហគមន៍នានាមានភាពតានតឹងជាយូរមកហើយជំវិញបញ្ហាដីធ្លី និងធនធានផ្សេងៗទៀត។

បទឈប់បាញ់សម្របសម្រួលដោយសហរដ្ឋអាមេរិក បានបញ្ចប់ការប្រយុទ្ធគ្នាដែលបានផ្ទុះឡើងនៅក្នុងទីក្រុង Sweida និងទីក្រុងជុំវិញនោះ។ ប្រទេសស៊ីរីបាននិយាយថា ខ្លួននឹងស៊ើបអង្កេតការប៉ះទង្គិចគ្នាដោយបង្កើតគណៈកម្មាធិការមួយក្រុម។