ភ្នំពេញ៖ ក្រសួងសង្គមកិច្ច និងអង្គការ Care for Children នៅថ្ងៃទី១៣ ខែមករា ឆ្នាំ ២០២២នេះ បានចុះកិច្ចព្រមព្រៀងជាមួយគ្នា លើគម្រោងសាកល្បងមួយ ដោយផ្តោតលើការផ្ទេរកុមារចេញពីមណ្ឌលថែទាំឱ្យមកស្នាក់នៅក្នុងគ្រួសារនិងសហគមន៍វិញ។
ក្រសួងសង្គមកិច្ច និងអង្គការ Care for Children បានចុះកិច្ចព្រមព្រៀង ដើម្បីធ្វើការរួមគ្នា លើកគម្រោងសាកល្បង ដោយផ្តោតសំខាន់លើការផ្ទេរកុមារចេញពីមណ្ឌលថែទាំឱ្យមកស្នាក់ក្នុងគ្រួសារនិងសហគមន៍វិញ។
គម្រោងសាកល្បងនេះ មានរយៈពេល ៣ឆ្នាំ ចាប់ពីឆ្នាំ ២០២២ ដល់ឆ្នាំ ២០២៥ ដោយអនុវត្តក្នុងភូមិសាស្ត្ររាជធានីភ្នំពេញ។
គម្រោងនេះទាំងមូល មានគោលដៅកិច្ចសហការ លើចំណុចជាច្រើន ដូចជា កែទម្រង់វិស័យសុខុមាលភាពកុមារនៅក្នុងប្រទេសកម្ពុជា ដើម្បីអភិវឌ្ឍការទុកដាក់កុមារទៅក្នុងគ្រួសារជាជម្រើសវិជ្ជមានជំនួសឱ្យការថែទាំនៅតាមមណ្ឌលថែទាំ។
បណ្ដុះបណ្ដាលបុគ្គលិកមណ្ឌលថែទាំកុមារក្នុងស្រុកអំពីជំនាញ និងចំណេះដឹងអំពីដំណើរការកម្មវិធីទុកដាក់កុមារនៅក្នុងគ្រួសារ បង្កើនគុណភាពជីវិតរបស់កុមារ តាមរយៈការទុកដាក់កុមារនៅក្នុងគ្រួសារក្នុងសហគមន៍ គាំទ្រដល់ការធ្វើសមាហរណកម្មកុមារចេញពីមណ្ឌលថែទាំរបស់រដ្ឋាភិបាល ទៅទុកដាក់នៅក្នុងគ្រួសារនិងសហគមន៍ តាមរយៈ ការជួយអាជ្ញាធរថ្នាក់ជាតិ និងអាជ្ញាធរថ្នាក់ក្រោមជាតិ។
អង្គការ Care for Children និងក្រសួងសង្គមកិច្ច ដោយមាននាយកដ្ឋានសុខុមាលភាពកុមារ និងគ្រប់គ្រងរួមគ្នាតាមរយៈការបែងចែកតួនាទីភារកិច្ច និងការទទួលខុសត្រូវ ដើម្បីអនុវត្តការងារស្របតាមផែនការសកម្មភាពប្រចាំឆ្នាំ ដែលកំណត់អំពីលទ្ធផលរំពឹងទុក សូចនាករ និងធនធានមនុស្ស និងថវិកាសម្រាប់អនុវត្តគម្រោង ព្រមទាំងដំណើរការតាមដានត្រួតពិនិត្យ និងវាយតម្លៃ។
ពាក់ព័ន្ធនឹងការងារពាក់ព័ន្ធកុមារនេះ កន្លងមកក្រសួងសង្គមកិច្ច បានអនុវត្តផែនការសកម្មភាព ដើម្បីធ្វើឱ្យប្រសើរឡើងនូវការថែទាំកុមារ និងសមាហរណកម្មកុមារចំនួន ៣០% ពីមណ្ឌលថែទាំកុមារ ទៅកាន់គ្រួសាររបស់ពួកគេវិញដោយសុវត្ថិភាព៕ អត្ថបទ៖ គឹមហុក
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
