អាជ្ញាធរបាននិយាយថា ទីប្រជុំជនជាច្រើននៅភាគខាងកើតប្រទេសអូស្ត្រាលី ត្រូវបានគ្របដណ្ដប់ដោយស្រទាប់ព្រិលដ៏ក្រាស់បំផុត និងយ៉ាងកម្រ ក្នុងពេលជាច្រើនទសវត្សរ៍ ដោយសារអាកាសធាតុអាក្រក់បានវាយលុកតំបន់នោះកាលពីចុងសប្តាហ៍នេះ ដែលបណ្តាលឱ្យមានទឹកជំនន់ ការខូចខាតដល់យានយន្ត និងដាច់ចរន្តអគ្គិសនីដល់លំនៅឋានរាប់ពាន់ខ្នង។

លោកស្រី Miriam Bradbury អ្នកជំនាញឧតុនិយមនៅការិយាល័យអាកាសធាតុរបស់អូស្ត្រាលី បាននិយាយថា ខ្យល់ត្រជាក់យ៉ាំងគំហុក បានទម្លាក់ព្រិលកម្រាស់ដល់ទៅ ៤០សង់ទីម៉ែត្រ នៅលើផ្នែកខ្លះនៃភាគខាងជើងរដ្ឋ New South Wales កាលពីថ្ងៃសៅរ៍ ០២ សីហា ដែលជាកម្រិតច្រើនបំផុតចាប់តាំងពីពាក់កណ្តាលទសវត្សរ៍ឆ្នាំ១៩៨០ មក។

លោកស្រី Bradbury បាននិយាយថា ព្រិលក៏បានធ្លាក់ក្នុងតំបន់នៃរដ្ឋជិតខាង Queensland ផងដែរ ជាលើកដំបូងបំផុតក្នុងពេល ១០ឆ្នាំ។ អ្នកជំនាញឧតុនិយមរូបនេះបន្តថា បម្រែបម្រួលអាកាសធាតុបានធ្វើឱ្យអាកាសធាតុរបស់អូស្ត្រាលី ប្រែប្រួលខ្លាំងក្នុងប៉ុន្មានឆ្នាំថ្មីៗ ប៉ុន្តែព្រឹត្តិការណ៍បែបនេះបានកើតឡើងជាច្រើនដងមកហើយក្នុងកំណត់ត្រាប្រវត្តិសាស្ត្រ។

ជាមួយគ្នានេះ ភ្លៀងធ្លាក់ខ្លាំងបានបោកបក់តំបន់ផ្សេងទៀត ដោយសេវាសង្គ្រោះបន្ទាន់របស់រដ្ឋ New South Wales និយាយថា ខ្លួនបានឆ្លើយតបទៅនឹងឧប្បត្តិហេតុជាង ១.៤៥៥ករណី ហើយថា រថយន្តជាង ១០០គ្រឿងត្រូវជាប់គាំងដោយព្រិល ព្យុះបានបំផ្លាញអគារ ហើយទីភ្នាក់ងារអាកាសធាតុចេញការព្រមានពីទឹកជំនន់ធំៗនៅតំបន់មួយចំនួន៕