ក្រុមបាតុករបានប្រមូលផ្តុំគ្នាកាលពីចុងសប្ដាហ៍នេះ ក្នុងទីក្រុងបាងកកទាមទារឱ្យមានការលាលែងពីតំណែងរបស់នាយករដ្ឋមន្ត្រីលោកស្រី Paetongtarn Shinawatra ដែលត្រូវបានតុលាការផ្អាកពីតួនាទី បន្ទាប់ពីមានជម្លោះព្រំដែនជាមួយប្រទេសកម្ពុជា។

ការតវ៉ានានានៅតែបន្តចាប់តាំងពីខែមុនមក ទាមទារទម្លាក់លោកស្រីចេញពីតំណែង។តុលាការធម្មនុញ្ញថៃ កាលពីថ្ងៃទី១ខែកក្កដា២០២៥ បានផ្អាកតំណែងលោកស្រី Paetongtarn Shinawatra។

ដោយត្រូវបានប្រមូលផ្តុំគ្នានៅវិមានជ័យជម្នះ ក្នុងទីក្រុងបាងកក ទោះមានសីតុណ្ហភាពក្ដៅកើនឡើងក៏ដោយ មនុស្សជាច្រើនបានស្តាប់សុន្ទរកថារិះគន់និងស្ដីបន្ទោសលោកស្រី Paetongtarn និងឪពុករបស់លោកស្រី គឺលោកថាក់ស៊ីន ស៊ីណាវ៉ាត់(Thaksin Shinawatra) អតីតនាយករដ្ឋមន្ត្រី។នគរបាលថៃបាននិយាយថា មានបាតុករប្រហែល២.០០០នាក់នៅពាក់កណ្តាលរសៀល ទោះមានមនុស្សកាន់តែច្រើនត្រូវគេរំពឹងថានឹងចូលរួមនៅពេលដែលសីតុណ្ហភាពក្ដៅចុះត្រជាក់វិញក៏ដោយ។

អ្នកស្រុកមួយចំនួនចោទប្រកាន់លោកស្រី Paetongtarn និងគ្រួសាររបស់លោកស្រីថាបង្កឱ្យមានជម្លោះអូសបន្លាយ និងវិបត្តិនយោបាយកប់យ៉ាងជ្រៅនៅក្នុងសង្គមថៃ ។

ដោយប្រើឈ្មោះហៅក្រៅរបស់លោកស្រី Paetongtarn ថា Ung Ing បាតុករម្នាក់ឈ្មោះ Jittakorn Bussaba បាននិយាយថា អ្នកត្រូវតែចុះចេញពីតំណែងទៅ។ព្រោះបាតដៃប្រឡាក់ឈាម។

ចំណែកបាតុករម្នាក់ទៀត វ័យ៥៨ឆ្នាំឈ្មោះ Ammorn Khunthong បាននិយាយថា Ung Ing បានបំផ្លាញប្រទេសថៃ ។លោក Thaksin និង គ្រួសាររបស់លោកមិនគួរគ្រប់គ្រង ឬបញ្ជាប្រទេសនេះតទៅទៀតឡើយ។

គួររម្លឹកថា ក្រុមបាតុករអាវលឿង ក៏បានជួយទម្លាក់រដ្ឋាភិបាលជាប់ឆ្នោតរបស់ប្អូនស្រីលោក Thaksin លោកស្រី Yingluck Shinawatra ផងដែរ ក្នុងរដ្ឋប្រហារឆ្នាំ២០១៤៕