បណ្តាញទូរទស្សន៍ Al Mayadeen បានរាយការណ៍ ដោយដកស្រង់សម្តីប្រភពថា គណៈប្រតិភូមួយក្រុមមកពីទីភ្នាក់ងារថាមពលបរមាណូអន្តរជាតិ (IAEA) នឹងទៅទស្សនកិច្ចទីក្រុងតេអេរ៉ង់ នៅសប្តាហ៍ ក្រោយ។

យោងតាមប្រភពបានឲ្យដឹងថា គណៈប្រតិភូនេះ នឹងមិនរួមបញ្ចូលក្រុមអធិការកិច្ចរបស់ទីភ្នាក់ងារនេះទេ ដោយសារ «ការពិភាក្សា នឹងត្រូវផ្តោតទៅលើទិដ្ឋភាពនយោបាយនៃបញ្ហានេះ»។ ភាគីទាំងពីរ ត្រូវបានគេរំពឹងថា នឹងដោះស្រាយ «យន្តការសម្រាប់ការអនុវត្តច្បាប់ស្តីពីការផ្អាកកិច្ចសហប្រតិបត្តិការ ជាមួយទីភ្នាក់ងារនេះ» ដែលទើបត្រូវបានអនុម័តដោយសភាអ៊ីរ៉ង់ នាពេលថ្មីៗនេះ។

កាលពីថ្ងៃទី ០២ ខែកក្កដា ប្រធានាធិបតីអ៊ីរ៉ង់លោក Masoud Pezeshkian បានចុះហត្ថលេខាលើច្បាប់ផ្អាកកិច្ចសហប្រតិបត្តិការជាមួយទីភ្នាក់ងារ IAEA។ ទោះជាយ៉ាងណាក៏ដោយ រដ្ឋមន្ត្រីការបរទេសរបស់ប្រទេសនេះ លោក Abbas Araghchi បាននិយាយកាលពីថ្ងៃទី ២២ ខែកក្កដាថា ប្រទេសអ៊ីរ៉ង់ មិនច្រានចោលថា ក្រុមអធិការរបស់ទីភ្នាក់ងារនេះ នឹងត្រូវបានអនុញ្ញាតឲ្យត្រួតពិនិត្យមើលទីតាំងនុយក្លេអែរណាមួយរបស់អ៊ីរ៉ង់ នៅពេលអនាគតនោះទេ ហើយនៅថ្ងៃទី ២៥ ខែកក្កដា អ្នកនាំពាក្យក្រសួងការបរទេសលោក Esmaeil Baghaei បានប្រកាសអំពីដំណើរទស្សនកិច្ចរបស់គណៈប្រតិភូនៃទីភ្នាក់ងារ IAEA ក្នុងប៉ុន្មានសប្តាហ៍ខាងមុខនេះ។