ភ្នំភ្លើងមួយនៅឧបទ្វីប Kamchatka ចុងបូព៌ារបស់ប្រទេសរុស្ស៊ី បានផ្ទុះឡើងពេញមួយយប់កាលពីថ្ងៃអាទិត្យ (០៣ សីហា) នៅក្នុងអ្វីដែលអ្នកវិទ្យាសាស្ត្របាននិយាយថា ជាព្រឹត្តិការណ៍បន្ទុះលើកដំបូងបំផុតក្នុងរយៈពេលរាប់រយឆ្នាំ ប៉ុន្មានថ្ងៃបន្ទាប់ពីការរញ្ជួយដីដ៏ធំកម្រិត ៨,៨រ៉ិចទ័រ។

ភ្នំភ្លើងឈ្មោះ Krasheninnikov បានផ្ទុះបញ្ជូនសំណុំផេះកម្ពស់ ៦គីឡូម៉ែត្រ ឡើងទៅលើមេឃ នេះបើយោងតាមបុគ្គលិកនៅតំបន់ Kronotsky Reserve ជាទីដែលភ្នំភ្លើងនេះស្ថិតនៅ។ រូបភាពដែលចេញផ្សាយដោយប្រព័ន្ធផ្សព្វផ្សាយរដ្ឋបានបង្ហាញឱ្យឃើញពីសំណុំផ្សែងផេះយ៉ាងក្រាស់ឃ្មឹក ដែលហុយឡើងលើពីកំពូលភ្នំភ្លើង។

លោក Olga Girina ប្រធានក្រុមឆ្លើយតបបន្ទុះភ្នំភ្លើងនៅតំបន់ Kamchatka បានប្រាប់ទីភ្នាក់ងារសារព័ត៌មានរដ្ឋរុស្ស៊ី RIA ថា "នេះគឺជាការផ្ទុះភ្នំភ្លើង Krasheninnikov លើកដំបូងហើយដែលត្រូវបានបញ្ជាក់ជាប្រវត្តិសាស្ត្រក្នុងពេល ៦០០ឆ្នាំ"។ ប៉ុន្តែទីភ្នាក់ងារតាមដានភ្នំភ្លើងសកលរបស់ស្ថាប័ន Smithsonian មានមូលដ្ឋាននៅសហរដ្ឋអាមេរិក បានកត់ត្រាការផ្ទុះចុងក្រោយរបស់ភ្នំភ្លើង Krasheninnikov នេះកាលពី ៤៧៥ឆ្នាំមុន ក្នុងឆ្នាំ១៥៥០៕