យោធារបស់ទីក្រុងម៉ានីល នៅថ្ងៃចន្ទ (ទី៤ ខែសីហា) នេះ បានប្រាប់ឲ្យដឹងថា នាវាចម្បាំងរបស់កងទ័ពជើងទឹកឥណ្ឌា ជាមួយសមភាគីហ្វីលីពីន បានចាប់ផ្តើមល្បាតជាលើកដំបូងជាមួយគ្នា នៅតំបន់នៃសមុទ្រចិនខាងត្បូងដែលមានជម្លោះ។

ការធ្វើនាវាចរណ៍រយៈពេល ២ថ្ងៃ មានរួមបញ្ចូលនាវាឥណ្ឌាចំនួន ៣គ្រឿង ហើយបានចាប់ផ្តើមនៅថ្ងៃទី៣ ខែសីហា ពោលគឺមួយថ្ងៃមុនពេលប្រធានាធិបតីហ្វីលីពីន លោក Ferdinand Marcos បានចេញដំណើរទៅបំពេញទស្សនកិច្ច នៅទីក្រុង New Delhi ដើម្បីពិភាក្សាជាមួយនាយករដ្ឋមន្ត្រីឥណ្ឌា លោក Narendra Modi។

ហ្វីលីពីនបានបង្កើនកិច្ចសហប្រតិបត្តិការការពារជាតិជាមួយសម្ព័ន្ធមិត្តជាច្រើន ក្នុងរយៈពេលមួយឆ្នាំចុងក្រោយនេះ បន្ទាប់ពីមានការប៉ះទង្គិចគ្នាជាបន្តបន្ទាប់នៅក្នុងផ្លូវទឹកដែលមានជម្លោះ។ ទីក្រុងប៉េកាំងទាមទារស្ទើរតែទាំងស្រុងនូវតំបន់នៃសមុទ្រចិនខាងត្បូង បើទោះបីជាមានសេចក្តីសម្រេចអន្តរជាតិថា ការអះអាងរបស់ខ្លួនមិនមានមូលដ្ឋានច្បាប់ក៏ដោយ។

នាវាកងទ័ពជើងទឹករបស់ប្រទេសឥណ្ឌា បានទៅដល់ទីក្រុងម៉ានីល សម្រាប់ដំណើរទស្សនកិច្ចនៅកំពង់ផែកាលពីចុងសប្តាហ៍មុន។ ហើយលោកវរសេនីយ៍ទោ John Paul Salgado បានប្រាប់អ្នកសារព័ត៌មានថា ការល្បាត «បានចាប់ផ្តើមកាលពីរសៀលម្សិលមិញ (ថ្ងៃទី៣ ខែសីហា) ហើយកំពុងបន្តរហូតដល់ពេលនេះ។ សកម្មភាព នាពេលនេះ គឺកំពុងមានប្រតិបត្តិការបំពេញឡើងវិញ នៅសមុទ្រ»។

បើយោងតាមជំនួយការរដ្ឋមន្ត្រីការបរទេសហ្វីលីពីន បានឲ្យដឹងថា អំឡុងពេលទស្សនកិច្ច នៅប្រទេសឥណ្ឌា លោក Marcos ត្រូវបានគេរំពឹងថា នឹងចុះហត្ថលេខាលើកិច្ចព្រមព្រៀងលើវិស័យជាច្រើន ដូចជាច្បាប់ វប្បធម៌ និងបច្ចេកវិទ្យាជាដើម ប៉ុន្តែក្រសែភ្នែកទាំងអស់នឹងផ្តោតទៅលើលទ្ធភាពនៃការមានកិច្ចព្រមព្រៀងការពារជាតិ៕