២សប្តាហ៍ក្រោយនាយកប្រតិបត្តិរបស់ក្រុមហ៊ុន Nvidia លោក Jensen Huang បានធ្វើការប្រឹងប្រែងដ៏គួរឲ្យទាក់ទាញ ដើម្បីបញ្ចុះបញ្ចូលទីផ្សារប្រទេសចិន ក្រុមហ៊ុនបន្ទះឈីបយក្សរបស់សហរដ្ឋអាមេរិក បានមើលឃើញខ្លួនឯងជាថ្មីម្តងទៀតថា ជាចំណុចនៃការចាប់អារម្មណ៍ នៅក្នុងទីក្រុងប៉េកាំង តែមិនមែនសុទ្ធតែនៅក្នុងផ្លូវល្អនោះឡើយ។

មួយថ្ងៃបន្ទាប់ពីនិយតករចិន បានកោះហៅតំណាងក្រុមហ៊ុនកាលពីថ្ងៃទី៣១ ខែកក្កដា ជុំវិញអ្វីដែលពួកគេចាត់ទុកថា «បញ្ហាសុវត្ថិភាពធ្ងន់ធ្ងរ» ទាក់ទងនឹងបន្ទះឈីបរបស់ក្រុមហ៊ុននោះ ការអត្ថាធិប្បាយពីសារព័ត៌មាន People's Daily ដែលត្រូវបានចាត់ទុកថា ជាស្ថាប័នផ្ដល់សាររបស់គណបក្សកុម្មុយនីស្ត បានដាក់ចំណងជើងថា «Nvidia តើខ្ញុំអាចទុកចិត្តអ្នកដោយរបៀបណា?»។

បន្ទះឈីបស្ថិតក្នុងមន្ទិលសង្ស័យ ដែលត្រូវបានគេស្គាល់ថា H20 រហូតមកដល់ពេលថ្មីៗនេះ គឺជាបន្ទះឈីបកម្រិតខ្ពស់បំផុតដែលក្រុមហ៊ុន Nvidia អាចលក់ទៅឲ្យប្រទេសចិនក្រោមការរឹតបន្តឹងរបស់សហរដ្ឋអាមេរិក។ ទីក្រុងវ៉ាស៊ីនតោនបានហាមឃាត់ការនាំចេញយ៉ាងមានប្រសិទ្ធភាព កាលពីខែមេសា ក្នុងអំឡុងពេលសង្គ្រាមពាណិជ្ជកម្មកំពុងឡើងកម្ដៅ ប៉ុន្តែបានបញ្ជាក់កាលពីខែកក្កដាថា ខ្លួននឹងអនុញ្ញាតឲ្យមានការលក់ឡើងវិញ។

មន្ត្រីអាមេរិកមួយចំនួន បានពោលសរសើរការបន្ធូរបន្ថយការគ្រប់គ្រងការនាំចេញនេះថា ជាផលចំណេញដល់កិច្ចចរចាពាណិជ្ជកម្មដែលកំពុងបន្តមានជាមួយទីក្រុងប៉េកាំង។ ប៉ុន្តែសម្បទានជាក់ស្តែងនេះ បណ្ដាអ្នកវិភាគ លើកឡើងថា មិនមែនសុទ្ធតែជាដំណឹងល្អ សម្រាប់ប្រទេសចិននោះឡើយ។

អនុប្រធាន និងអ្នកវិភាគ នៅក្រុមហ៊ុនប្រឹក្សា Forrester Research លោក Charlie Dai បាននិយាយថា៖ «ការកែប្រែនូវការហាមឃាត់ លើបន្ទះឈីប H20 ផ្តល់នូវការធូរស្រាលរយៈពេលខ្លី សម្រាប់ឧស្សាហកម្មបញ្ញាសិប្បនិម្មិត (AI) របស់ប្រទេសចិន។ តែយ៉ាងណាក្ដី វាអាចបន្ថយល្បឿននៃការសម្របខ្លួនប្រើប្រាស់បន្ទះឈីប ក្នុងស្រុក និងជះឥទ្ធិពលដល់ល្បឿននៃការពឹងផ្អែកខ្លួនឯងលើបច្ចេកវិទ្យា ស្របពេលជម្លោះភូមិសាស្ត្រនយោបាយកំពុងបន្តមាន»៕