វិមានក្រឹមឡាំង នៅថ្ងៃចន្ទ (ទី៤ ខែសីហា) នេះ បានបញ្ជាក់ថា បុគ្គលគ្រប់រូបគួរតែប្រយ័ត្នប្រយែង ចំពោះវោហាសាស្ត្រនុយក្លេអ៊ែរ ជាការឆ្លើយតបដំបូងរបស់ខ្លួន ចំពោះសេចក្តីថ្លែងការណ៍របស់ប្រធានាធិបតីអាមេរិក លោក Donald Trump ដែលថា លោកបានបញ្ជាឲ្យរៀបចំដាក់ទីតាំងឡើងវិញ សម្រាប់នាវាមុជទឹកនុយក្លេអ៊ែររបស់សហរដ្ឋអាមេរិក។

អ្នកនាំពាក្យវិមានក្រឹមឡាំង លោក Dmitry Peskov បាននិយាយសម្រាលពីសារៈសំខាន់នៃការអត្ថាធិប្បាយរបស់លោក Trump ដោយលើកឡើងថា វាគឺច្បាស់ណាស់ថា ទោះតាមវិធីណា នាវាមុជទឹកអាមេរិក បានស្ថិតនៅក្នុងកាតព្វកិច្ចប្រយុទ្ធរួចហើយ។ លោកបានបញ្ជាក់ថា ទីក្រុងមូស្គូមិនមានបំណងចង់ប្រកែកតវ៉ាជាមួយលោក Trump លើបញ្ហានេះឡើយ។

លោក Trump បាននិយាយកាលពីថ្ងៃសុក្រចុងសប្ដាហ៍កន្លងមកថា លោកបានបញ្ជាឲ្យដាក់ទីតាំងនាវាមុជទឹកនុយក្លេអ៊ែរចំនួន ២គ្រឿង ក្នុង «តំបន់សមស្រប" ដើម្បីឆ្លើយតបទៅនឹងការកត់សម្គាល់របស់អតីតប្រធានាធិបតីរុស្ស៊ី លោក Dmitry Medvedev អំពីហានិភ័យនៃការមានសង្គ្រាម រវាងគូអរិប្រដាប់អាវុធនុយក្លេអ៊ែរទាំង២។

ជាមួយគ្នានេះ វិមានក្រឹមឡាំងក៏បានឲ្យដឹងផងដែរថា ដំណើរទស្សនកិច្ច នាពេលខាងមុខ នៅទីក្រុងមូស្គូ ដោយបេសកជនពិសេសរបស់លោក Trump គឺលោក Steve Witkoff នឹងមានសារៈសំខាន់ និងផ្ដល់ជាប្រយោជន៍៕