អ្នកនាំពាក្យនៃទីបញ្ជាការភូមិភាគខាងត្បូង នៅថ្ងៃចន្ទ (ទី៤ ខែសីហា) នេះ បានប្រាប់ថា យោធារបស់ប្រទេសចិន បានធ្វើការល្បាតនៅសមុទ្រចិនខាងត្បូង ចាប់ពីថ្ងៃទី៣ ដល់ថ្ងៃទី៤ ខែសីហា។

ដូចគ្នាដែរ នៅថ្ងៃចន្ទនេះ ហ្វីលីពីនបានឲ្យដឹងថា កងទ័ពជើងទឹករបស់ខ្លួន និងឥណ្ឌា បានធ្វើនាវាចរណ៍រួមគ្នាជាលើកដំបូង នៅក្នុងសមុទ្រចិនខាងត្បូង ជាទីដែលចិនទាមទារស្ទើរតែទាំងស្រុងនៃតំបន់ ដែលមានការត្រួតស៊ីគ្នាជាមួយតំបន់ដែនសមុទ្រនៃប្រទេសព្រុយណេ ឥណ្ឌូនេស៊ី ម៉ាឡេស៊ី ហ្វីលីពីន និងវៀតណាម។

អ្នកនាំពាក្យបានពណ៌នាការល្បាតរបស់ចិននេះថា ជាការធ្វើសកម្មភាព «តាមទម្លាប់» ប៉ុន្តែបាននិយាយថា អ្វីដែលឲ្យឈ្មោះថា «ការល្បាតរួមគ្នា» របស់ហ្វីលីពីន បានរំខានដល់សន្តិភាព និងស្ថិរភាព ក្នុងតំបន់។

ស្ថានទូតហ្វីលីពីន ប្រចាំនៅទីក្រុងប៉េកាំង មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ៕