ការិយាល័យអាកាសធាតុរបស់ទីក្រុងហុងកុង បាននិយាយថា ការព្រមានអំពីព្យុះភ្លៀង "ពណ៌ខ្មៅ" ដែលជាកម្រិតខ្ពស់បំផុតរបស់ខ្លួន នឹងនៅតែមានរហូតដល់ម៉ោងក្នុងស្រុក ១១ព្រឹកថ្ងៃអង្គារ (០៥ សីហា) ខណៈភ្លៀងធ្លាក់ខ្លាំងបានវាយលុកមជ្ឈមណ្ឌលហិរញ្ញវត្ថុអាស៊ីមួយនេះ បង្ខំឱ្យបិទមន្ទីរពេទ្យ សាលារៀន និងតុលាការ រួមទាំងបង្កផលប៉ះពាល់ និងការរំខានជាច្រើនទៀតស្ទើរគ្រប់ទីកន្លែងទូទាំងក្រុង។

ព្យុះភ្លៀងដ៏ខ្លាំងក្លានេះបានកើតឡើងបន្ទាប់ពីទឹកជំនន់យ៉ាងគំហុកនៅភាគខាងត្បូងប្រទេសចិន កាលពីចុងសប្តាហ៍ ដែលបានបណ្តាលឱ្យមនុស្សជាច្រើននាក់ស្លាប់នៅក្នុងខេត្តក្វាងទុង និងបានជំរុញឱ្យមានប្រតិបត្តិការស្វែងរកទ្រង់ទ្រាយធំ ពាក់ព័ន្ធនឹងអ្នកជួយសង្គ្រោះជាង ១.៣០០នាក់។

ក្រុមសង្កេតការណ៍ហុងកុង បាននិយាយក្នុងព្រឹត្តិបត្រលើគេហទំព័រខ្លួនថា "ព្យុះភ្លៀងជាបន្តបន្ទាប់នឹងបណ្តាលឱ្យមានការជន់លិចផ្លូវធ្ងន់ធ្ងរ និងការកកស្ទះចរាចរណ៍។ សាធារណៈជនត្រូវបានណែនាំអោយជ្រកកោននៅទីសុវត្ថិភាព"។ អាជ្ញាធរក្រុងបានរាយការណ៍ថា មានរន្ទះបាញ់ជិត ១ម៉ឺនករណី កើតឡើងនៅទូទាំងទីក្រុង ចន្លោះម៉ោងក្នុងស្រុក ៦ព្រឹក ដល់ម៉ោង ៦:៥៩នាទីព្រឹក។

យោងតាមអាជ្ញាធរអាកាសធាតុរបស់ប្រទេសចិន បានឱ្យដឹងថា ភ្លៀងធ្លាក់រហូតដល់ ៦០-៩០មីលីម៉ែត្រ កំពុងវាយលុកទីក្រុងហុងកុង និងទីក្រុងក្វាងចូវ ដែលនៅជិតនោះ ក្នុងពេលត្រឹមមួយម៉ោង។ គួរឱ្យដឹងថា ជាធម្មតា ទីក្រុងហុងកុងទទួលបានទឹកភ្លៀងជាមធ្យម ២.២២០មីលីម៉ែត្រប្រចាំឆ្នាំ ដែលច្រើនជាងពាក់កណ្តាលនៃតួលេខនេះធ្លាក់ពីខែមិថុនា ដល់ខែសីហា៕