កណ្ដាល៖ លោកជំទាវកិត្តិសង្គហបណ្ឌិត ឃួន សុដារី អនុប្រធានទី២រដ្ឋសភាជាតិ និងជាប្រធានគណៈអចិន្ត្រៃក្រុមការងារថ្នាក់កណ្ដាលចុះជួយស្រុកលើកដែក ខេត្តកណ្ដាល បានជំរុញទៅដល់អាជ្ញាធរមូលដ្ឋានទាំងអស់ ពិសេសក្រុមប្រឹក្សាឃុំសង្កាត់ ត្រូវកត់ត្រានូវសំណូមពរ របស់ពលរដ្ឋឲ្យបានច្បាស់លាស់ ដើម្បីដោះស្រាយជូនពួកគាត់ ។

ក្នុងសន្និបាតគណៈកម្មាធិការគណបក្សប្រជាជនកម្ពុជា ឃុំព្រែកដាច់ ស្រុកលើកដែក នៅថ្ងៃទី១៤ ខែមករា ឆ្នាំ២០២២ លោកជំទាវកិត្តិសង្គហបណ្ឌិត មានប្រសាសន៍ថា បើតាមការពិនិត្យ ឃើញ ក្នុង​ពេលក្រុមការងារចុះសាកសួរសុខទុក្ខពលរដ្ឋដោយផ្ទាល់ ​គ្រប់កាលៈទេសៈ ឃើញថាពួកគាត់​គ្រប់​ស្រទាប់ មានទឹកចិត្តស្រលាញ់គណបក្សប្រជាជនកម្ពុជា និងចូលរួមយ៉ាង​សស្រាក់សស្រាំ​រាល់​ទុក្ខលំបាក ​និងភាពសប្បាយរីករាយនានា ។

លោកជំទាវបន្តថា ពាក់ព័ន្ធការចុះសួរសុខទុក្ខនេះ ​អាជ្ញាធរមូលដ្ឋាន ត្រូវបន្តចុះនៅ​តាមខ្នងផ្ទះ​របស់​ប្រជាពលរដ្ឋឲ្យបាន​ញឹកញាប់​ ក្នុងមូលដ្ឋានរបស់ខ្លួន ​ដើម្បីស្វែងយល់ពីតម្រូវរបស់ពួកគាត់ និង​សំណូមពរផ្សេងៗ ​ហើយប្រមូលកត់ត្រាទុក ​នូវរាល់សំណូមពររបស់ពលរដ្ឋ ​ដើម្បីដោះស្រាយ និង​ចងក្រងជាគំនិតក្នុងការបំផុសចេញជាគោលនយោបាយ​ និងផែនការអភិវឌ្ឍ ។

ជាមួយគ្នានេះ លោកជំទាវកិត្តិសង្គហបណ្ឌិត ឃួន សុដារី ក៏បានអំពាវនាវទៅដល់ពលរដ្ឋទាំងអស់​ត្រូវនាំគ្នាទៅចាក់វ៉ាក់សាំងកូវីដ១៩ ​ឲ្យគ្រប់ចំនួនដូស​ ដែលរាជរដ្ឋាភិបាលបានអំពាវនាវជាបន្តបន្ទាប់ និងរួមគ្នាបន្តអនុវត្តនូវវិធានការសុខាភិបាល ៣កុំ ៣ការពារ ឲ្យបានខ្ជាប់ខ្ជួន ដើម្បីកុំឲ្យកម្ពុជា មានការឆ្លងរាលដាលខ្លាំងជាថ្មី ​នៃជំងឺកូវីដ១៩ ​ពិសេសប្រភេទបម្លែងថ្មីអូមីក្រុង ។

គួរបញ្ជាក់ថា ​សម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់ ​នៅអាណត្តិទី៥ ឆ្នាំ២០២២នេះ សមាសភាពបេក្ខជនគណបក្សប្រជាជនកម្ពុជា ​ឈរក្រុមប្រឹក្សាឃុំព្រែកដាច់ ស្រុកលើកដែល ពេញសិទ្ធិមានចំនួន ៧រូប និងបម្រុងមានចំនួន ៩រូប ៕