កាសែតគ្រប់គ្រងដោយរដ្ឋាភិបាលរបស់ប្រទេសនេះ បានរាយការណ៍ថា ប្រធានាធិបតីទួរគីលោក រ៉េសិប តាយីប អឺដូហ្កាន់ (Recep Tayyip Erdogan) អាចនឹងបំពេញទស្សនកិច្ចនៅអ៊ុយក្រែន ក្នុងប៉ុន្មានថ្ងៃខាងមុខ។

យោងតាមសារព័ត៌មាននេះ ដំណើរទស្សនកិច្ចដ៏មានសក្តានុពលរបស់លោក អឺដូហ្កាន់ ទៅកាន់ទីក្រុងគីវ តាមការអញ្ជើញរបស់លោក វ្ល៉ូឌីមី ហ្សេឡិនស្គី កំពុងត្រូវបានសម្លឹងមើលនៅក្នុងមជ្ឈដ្ឋានការទូតរបស់ប្រទេសនេះ។ ប្រភពនិយាយថា ដំណើរទស្សនកិច្ចបែបនេះ អាចនឹងធ្វើឡើង ក្នុងរយៈពេលប៉ុន្មានថ្ងៃប៉ុណ្ណោះ។

សារព័ត៌មាននេះ បានសរសេរ ដោយដកស្រង់ប្រភពការទូត និងឯកអគ្គរដ្ឋទូតថ្មីរបស់អ៊ុយក្រែនប្រចាំនៅទីក្រុងអង់ការ៉ាលោក Mariman Dzhelyalov ថា របៀបវារៈនៃដំណើរទស្សនកិច្ចនេះ នឹងផ្តោតលើការ    ផ្តល់សច្ចាប័នលើកិច្ចព្រមព្រៀងពាណិជ្ជកម្មសេរីរវាងប្រទេសទាំងពីរ និងការខិតខំប្រឹងប្រែងឆ្ពោះទៅរកសន្តិភាពជាមួយរុស្ស៊ី។  

កិច្ចព្រមព្រៀងពាណិជ្ជកម្មសេរីរវាងទួរគី និងអ៊ុយក្រែន ត្រូវបានចុះហត្ថលេខា ក្នុងខែកុម្ភៈ ឆ្នាំ ២០២២ និងអនុម័តដោយប្រធានាធិបតីទួរគី ក្នុងខែសីហា ឆ្នាំ ២០២៤។

អាជ្ញាធរទួរគី មិនបានបញ្ជាក់ ឬបដិសេធរបាយការណ៍ទាំងនេះទេ។

លោកប្រធានាធិបតីទួរគី បាននិយាយម្តងហើយម្តងទៀតថា ប្រទេសរបស់លោកត្រៀមខ្លួនជាស្រេច ដើម្បីធ្វើជាម្ចាស់ផ្ទះកិច្ចប្រជុំរវាងមេដឹកនាំរុស្ស៊ីនិងអ៊ុយក្រែន ហើយបានសម្តែងក្តីសង្ឃឹមថា កិច្ចប្រជុំបែបនេះ នឹងផ្តល់កិច្ចព្រមព្រៀង ដែលនឹងបញ្ចប់ជម្លោះអ៊ុយក្រែន។