មនុស្សរាប់លាននាក់នៅទូទាំងតំបន់ភាគខាងលិចប៉ែកកណ្ដាល និងភាគឦសានរបស់សហរដ្ឋអាមេរិក កំពុងស្ថិតនៅក្រោមការព្រមានពីគុណភាពខ្យល់ដ៏គ្រោះថ្នាក់កាលពីថ្ងៃចន្ទ (០៤ សីហា) ខណៈផ្សែងយ៉ាងខ្មួលខ្មាញ់ហុយពីចំហេះព្រៃរាប់រយកន្លែងនៅប្រទេសជិតខាងកាណាដា បានគ្របដណ្ដប់ពាសពេញតំបន់របស់សហរដ្ឋអាមេរិក។

សេវាអាកាសធាតុជាតិអាមេរិកនិយាយថា ផ្ទៃមេឃពោរពេញដោយផ្សែងអួរអ័ព្ទ ត្រូវបានរំពឹងថានឹងកើតមាននៅក្នុងរដ្ឋនានាទូទាំងសហរដ្ឋអាមេរិកដូចជា Minnesota, Wisconsin, Michigan, New York, និង Maine ជាដើម រួមទាំងកន្លែងផ្សេងទៀត។

ចំហេះព្រៃជិត ២០០កន្លែង កំពុងឆាបឆេះគ្រប់គ្រងមិនបាននៅកាណាដា រួមទាំងចំហេះ ៨១កន្លែង នៅខេត្ត Saskatchewan និងជិត ១៦០កន្លែងនៅខេត្ត Manitoba រួមទាំង ៦១កន្លែង នៅខេត្ត Ontario ។ តួលេខពីមជ្ឈមណ្ឌលចំហេះព្រៃកាណាដាបង្ហាញថា ផ្ទៃដីជាង ៦លានហិកតា ត្រូវឆាបឆេះរហូតមកដល់ពេលនេះ ក្នុងអ្វីដែលទំនងជារដូវកាលចំហេះព្រៃដ៏អាក្រក់បំផុតទីពីររបស់កាណាដា ក្នុងកំណត់ត្រា។

សន្ទស្សន៍គុណភាពខ្យល់កាលពីថ្ងៃចន្ទ នៅទូទាំងរដ្ឋរបស់អាមេរិកចំនួន១៤ នៅតំបន់ភាគខាងលិចប៉ែកកណ្តាល និងភាគឦសាន មានចាប់ពី "មធ្យម" ទៅ "មិនល្អ" សម្រាប់សាធារណៈជនទូទៅ។ គួរឱ្យដឹងថា ផ្សែងចំហេះព្រៃគឺជាក្ដីបារម្ភជាពិសេស ព្រោះផ្សែងនោះមានភាគល្អិតតូចៗអង្កត់ផ្ចិតតិចជាង ២,៥មីក្រូម៉ែត្រ - ពោលគឺប្រហែល ៤% នៃអង្កត់ផ្ចិតមេដ្យានរបស់សរសៃសក់មនុស្ស។

ផ្សែងបំពុលខ្យល់ប្រភេទនេះមានគ្រោះថ្នាក់ណាស់ ដោយសារភាគល្អិតនោះមានទំហំតូចល្មមអាចជ្រាបចូលជ្រៅទៅក្នុងសួត ដែលអាចធ្វើឱ្យកាន់តែធ្ងន់ធ្ងរ ឬបង្កើនហានិភ័យនៃជំងឺហឺត មហារីកសួត និងជំងឺសួតរ៉ាំរ៉ៃផ្សេងៗទៀត៕