កម្លាំងសន្តិសុខសូម៉ាលីបាននិយាយថា ពួកគេបានសម្លាប់យុទ្ធជននៃក្រុមភេរវករ Daesh ជាច្រើននាក់ និងបានរឹបអូសបានទីតាំងរបស់ក្រុមភេរវករចំនួន ៨ ក្នុងអំឡុងពេលប្រតិបត្តិការយោធា ដែលកំពុងបន្ត នៅក្នុងតំបន់ Puntland ពាក់កណ្តាលស្វយ័ត។

ក្រុម Daesh មានវត្តមានតិចតួច ក្នុងប្រទេសសូម៉ាលី បើធៀបនឹងក្រុមក្រុមអាល់សាបាប (Al-Shabab) ដែលមានទំនាក់ទំនងនឹងអាល់កៃដា ប៉ុន្តែក្រុមអ្នកជំនាញ បានព្រមានពីសកម្មភាពដែលកំពុងកើនឡើង។

មន្ត្រីប្រឆាំងអំពើភេរវកម្មរបស់អង្គការសហប្រជាជាតិកាលពីឆ្នាំមុន បានព្រមានអំពីការកើនឡើងនៃការវាយប្រហារដោយក្រុម Daesh នៅក្នុងប្រទេសម៉ូសំប៊ិក សាធារណរដ្ឋប្រជាធិបតេយ្យកុងហ្គោ និងសូម៉ាលី។

មន្ត្រីយោធាសូម៉ាលី បាននិយាយថា ប្រតិបត្តិការកាលពីថ្ងៃចន្ទនៅក្នុងខេត្តភាគខាងជើង គឺផ្តោតជុំវិញភ្នំ Cal Miskat ក្នុងតំបន់ Bari ។

កងទ័ពនៃតំបន់ Puntland បាននិយាយនៅក្នុងសេចក្តីថ្លែងការណ៍មួយថា៖«កងកម្លាំងសន្តិសុខ បានកាន់កាប់ប៉ុស្តិ៍យោធារបស់ក្រុម Daesh ចំនួន ៨ រួមទាំងទីតាំងសំខាន់មួយ នៅភ្នំ Cal Miskat ខ្មាន់កាំភ្លើងជាច្រើន ក្នុងនោះមានអ្នកប្រយុទ្ធបរទេសដែរ ត្រូវបានសម្លាប់ នៅក្នុងប្រតិបត្តិការយោធា»។