ការស្ទង់មតិថ្មីមួយចាប់ពីថ្ងៃទី១០ ដល់ទី១៤ ខែកក្កដា កន្លងទៅ របស់សារព័ត៌មាន AP បានរកឃើញថា ភាគច្រើននៃមនុស្សពេញវ័យនៅសហរដ្ឋអាមេរិក បានសម្ដែងក្ដីបារម្ភយ៉ាងខ្លាំងពីតម្លៃគ្រឿងទេស ដែលបន្តហក់ឡើង និងការព្រួយបារម្ភពីផលប៉ះពាល់រីករាលដាលនៃរបាំងពន្ធពាណិជ្ជកម្មរបស់លោកប្រធានាធិបតី Donald Trump។

ការស្ទង់មតិពីមជ្ឈមណ្ឌល NORC របស់សារព័ត៌មាន AP សម្រាប់ការស្រាវជ្រាវកិច្ចការសាធារណៈបង្ហាញថា ប្រហែលពាក់កណ្តាលនៃជនជាតិអាមេរិកជាង ១.៤០០នាក់ដែលត្រូវស្ទង់មតិទាំងអស់ បាននិយាយថា ការចំណាយលើគ្រឿងទេសជាប្រភពនៃភាពតានតឹងដ៏ឈឺក្បាល "ខ្លាំងបំផុត" ក្នុងជីវិតរបស់ពួកគេនាបច្ចុប្បន្ននេះ ខណៈតួលេខ ៣៣% និយាយថា ចំណុចនេះជាប្រភពនៃភាពតានតឹង "តិចតួច"។

ការស្ទង់មតិបន្តថា មានតែអត្រា ១៤% ប៉ុណ្ណោះនៃអ្នកឆ្លើយតប បាននិយាយថា គ្រឿងទេសឡើងថ្លៃពុំមែនជាប្រភពនៃភាពតានតឹងទេ ដែលគូសបញ្ជាក់ពីក្ដីបារម្ភដ៏រីករាលដាល ដែលជនជាតិអាមេរិកភាគច្រើនបន្តជួបប្រទះទាក់ទងនឹងតម្លៃសម្ភារៈចាំបាច់ប្រចាំថ្ងៃ។ ការស្ទង់មតិក៏រកឃើញថា ជនជាតិអាមេរិកប្រហែល ៤នាក់ក្នុងចំណោម ១០នាក់ អាយុក្រោម ៤៥ឆ្នាំ និយាយថា ពួកគេប្រើវិធីសាស្រ្ត "ទិញសិន ចាំបង់ប្រាក់ពេលក្រោយ" ទៅលើការកម្សាន្ត ឬអាហារភោជនីយដ្ឋាន ឬនៅពេលបង់ថ្លៃចាំបាច់ ដូចជាគ្រឿងទេស ឬការថែទាំវេជ្ជសាស្រ្តជាដើម។

ការស្ទង់មតិបានឱ្យដឹងថាទៀតថា ចំនួន ៦៤% នៃជនជាតិអាមេរិក ដែលមានប្រាក់ចំណូលទាបបំផុត - ពោលគឺអ្នកមានប្រាក់ចំណូលក្នុងគ្រួសារតិចជាង ៣០.០០០ដុល្លារ ក្នុងមួយឆ្នាំ - និយាយថា ការចំណាយលើគ្រឿងទេសដែលចេះតែឡើងថ្លៃមិនឈប់ជាភាពតានតឹង "សំខាន់បំផុត" សម្រាប់ពួកគេ៕