រដ្ឋាបាលរបស់តំបន់នេះ បាននិយាយថា មានតែ ១៤%នៃតម្រូវការមនុស្សធម៌នៅតំបន់ហ្កាហ្សាប៉ុណ្ណោះដែលត្រូវបានបំពេញ ចាប់តាំងពីអ៊ីស្រាអែល បានអនុញ្ញាតឲ្យមានការបន្តឡើងវិញដោយផ្នែកនៃការផ្តល់ជំនួយសង្គ្រោះ ទៅកាន់ដែនដីនេះ។

រដ្ឋបាលបាននិយាយថា៖«មានតែរថយន្តដឹកទំនិញចំនួន ៦៧៤គ្រឿងប៉ុណ្ណោះ ដែលបានចូលទៅកាន់តំបន់ហ្កាហ្សា ក្នុងរយៈពេល ៨ថ្ងៃកន្លងទៅ ខណៈដែលរថយន្តដឹកទំនិញប្រហែល ៤.៨០០គ្រឿង ត្រូវការដើម្បីបំពេញតម្រូវការមនុស្សធម៌អប្បបរមា» ដោយបានបន្ថែមថា តំបន់នេះ ត្រូវការរថយន្តដឹកទំនិញយ៉ាងហោចណាស់ ៦០០គ្រឿង ដែលមានជំនួយមនុស្សធម៌ និងប្រេងឥន្ធនៈ ក្នុងមួយថ្ងៃ។

យោងតាមក្រសួងសុខាភិបាលនៅតំបន់ហ្កាហ្សា ចំនួនអ្នកស្លាប់ដោយសារភាពអត់ឃ្លាន នៅក្នុងតំបន់ហ្កាហ្សា បានកើនឡើងដល់ ១៨០នាក់ ក្នុងនោះមានអនីតិជនចំនួន ៩៣នាក់។

ជំនួយមនុស្សធម៌ពីអង្គការមនុស្សធម៌អន្តរជាតិ និងរចនាសម្ព័ន្ធរបស់អង្គការសហប្រជាជាតិ មិនបានទៅដល់តំបន់ហ្កាហ្សាស្ទ្រីបទេ ចាប់តាំងពីថ្ងៃទី ០២ ខែមីនា នៅពេលដែលអ៊ីស្រាអែល បានបិទច្រកចូលផ្លូវការទាំងអស់។ ចាប់តាំងពីខែឧសភាមក អ៊ីស្រាអែល បាននឹងកំពុងអនុវត្តគម្រោងថ្មីដែលគាំទ្រដោយសហរដ្ឋអាមេរិក ដើម្បីរៀបចំជំនួយសម្រាប់ប្រជាជននៅតំបន់ហ្កាហ្សា ដែលផ្ទេរសិទ្ធិផ្តាច់មុខក្នុងការបង្កើតមជ្ឈមណ្ឌលចែកចាយ និងផ្តល់ស្បៀងអាហារ និងទំនិញសំខាន់ៗ ដល់មូលនិធិមនុស្សធម៌ហ្កាហ្សា (GHF)។ យោងតាមផែនការ អង្គការអន្តរជាតិទាំងអស់ដែលចូលរួមក្នុងកិច្ចខិតខំប្រឹងប្រែងផ្តល់ជំនួយ រួមទាំងទីភ្នាក់ងាររបស់អង្គការសហប្រជាជាតិ ត្រូវដំណើរការតែ តាមរយៈមូលនិធិមនុស្សធម៌ហ្កាហ្សា ប៉ុណ្ណោះ។