អ្នកស្រុកជាប់ខ្លួនក្នុងកម្ទេចកម្ទី ត្រូវបានជួយសង្រ្គោះដោយកងទ័ពឥណ្ឌា នៅទីក្រុង Uttarkashi ស្ថិតតំបន់ភ្នំហិម៉ាឡៃ ប្រទេសឥណ្ឌា ដែលរងការវាយប្រហារដោយទឹកជំនន់ដ៏គំហក់នាថ្ងៃអង្គារនេះ ស្របពេលដែលរដ្ឋបានស្រុក ជាមួយងកម្លាំងឆ្លើយតបគ្រោះមហន្តរាយរដ្ឋ និងជាតិ បានចុះប្រតិបត្តិការជម្លៀសខ្លួនរួមគ្នា ។

សារព័ត៌មានក្នុងស្រុក រាយការណ៍ថា មនុស្សយ៉ាងហោច ៤នាក់ បានស្លាប់ និងមនុស្សជាង ៥០នាក់ផ្សេងទៀត កំពុងបាត់ខ្លួន ក្រោយទឹកជំនន់ដ៏គំហុកបង្កឡើងដោយសារព្យុះភ្លៀង ។

លោក Ramesh Kumar Sudhanshu គឺជាប្រធាននាយកដ្ឋានរដ្ឋ Uttarakhand និយាយថា មាននូវលទ្ធភាពនៃការបាត់បង់អាយុជីវិតមនុស្ស និងខូចខាតទ្រព្យសម្បត្តិ តាមអ្វីដែលពួកយើងអាចយល់បាន ។ ពួកយើងបានបញ្ជូនកងកម្លាំងឆ្លើយតបគ្រោះមហន្តរាយជាតិ ក៏ដូចជាកងកម្លាំងឆ្លើយតបគ្រោះមហន្តរាយរដ្ឋ ហើយជាបឋមពួកយើងកំពុងធ្វើការវាយតម្លៃ ហើយពួកយើងនឹងចាត់វិធានការឲ្យបានឆាប់រហ័សតាមដែលអាចធ្វើទៅបាន ។

ខណៈពេលនោះដែរ នគរបាលរដ្ឋ Uttarakhand និយាយនៅក្នុងសារបង្ហោះលើបណ្តាញព័ត៌មានសង្គម Xថា ទំនងជាមាននូវការខូចខាតច្រើន ដោយសារកម្រិតទឹកកើនឡើងនៅតំបន់ Harshil ស្ថិតទីក្រុង Uttarkashi ហើយពួកគេស្នើសុំឲ្យអ្នកស្រុកនៅឆ្ងាយពីមាត់ទន្លេ ។

រដ្ឋ Uttarakhand ដែលស្ថិតនៅតំបន់ភ្នំហិម៉ាឡៃ បានមើលឃើញចំនួនកើនឡើងទឹកជំនន់ដ៏គំហុក និងបំណាក់ដី ក្នុងនោះក្រុមអ្នកជំនាញមួយចំនួន បានដាក់ការស្តីបន្ទោសលើបញ្ហាបម្រែបម្រួលអាកាសធាតុ ៕