ប្រធានាធិបតីសហរដ្ឋអាមេរិក លោក Donald Trump បានលើកឡើងថា លោកនឹងមិនរារាំងផែនការរបស់អ៊ីស្រាអែល ដែលអាចធ្វើទៅបានក្នុងការកាន់កាប់តំបន់ហ្កាហ្សានោះទេ។  

នៅពេលត្រូវបានសួរកាលពីថ្ងៃអង្គារ សប្ដាហ៍នេះ អំពីរបាយការណ៍ដែលថានាយករដ្ឋមន្ត្រីអ៊ីស្រាអែលលោក Benjamin Netanyahu បានសម្រេចចិត្តកាន់កាប់ដែនដីប៉ាឡេស្ទីនទាំងមូលនោះ លោក Trump បាននិយាយថាលោកផ្តោតលើការទទួលបានអាហារសម្រាប់ប្រជាជន នៅក្នុងតំបន់ហ្កាហ្សា។

ប្រធានាធិបតីអាមេរិកបានប្រាប់អ្នកយកព័ត៌មានថា អ្វីលើសពីនេះផ្សេងទៀត លោកពិតជាមិនអាចនិយាយបានទេ។

បន្ទាប់ពីបទឈប់បាញ់ជាប់គាំងជាច្រើនខែ លោក Netanyahu និងលោក Trump ត្រូវគេរាយការណ៍ថាកំពុងធ្វើការលើបទឈប់បាញ់មួយដែលដាក់ឱសានវាទដល់ក្រុមហាម៉ាស ឲ្យដោះលែងចំណាប់ខ្មាំង និងយល់ព្រមទម្លាក់អាវុធ ពុំនោះនឹងត្រូវបន្តសង្គ្រាមទៀត។

ទីក្រុងវ៉ាស៊ីនតោនផ្តល់ជំនួយយោធារាប់ពាន់លានដុល្លារដល់អ៊ីស្រាអែលជារៀងរាល់ឆ្នាំ ជាជំនួយដែលបានកើនឡើងយ៉ាងខ្លាំងបន្ទាប់ពីការចាប់ផ្តើមសង្រ្គាមរបស់អ៊ីស្រាអែលនៅលើតំបន់ហ្កាហ្សាក្នុងខែតុលាឆ្នាំ ២០២៣ កន្លងទៅ ។   

អ៊ីស្រាអែលបានប្រើការបញ្ជាជម្លៀសដោយបង្ខំដើម្បីច្របាច់ប្រជាជនប៉ាឡេស្ទីនឱ្យចូលក្នុងទីតាំងនានា ដែលមិនធ្លាប់មានក្នុងតំបន់ហ្កាហ្សា ដោយបង្វែរផ្ទៃដី ៨៦ ភាគរយនៃដែនដីនេះ ទៅជាតំបន់យោធា៕