ប្រទេសហូឡង់ ស៊ុយអែត ន័រវែស និងប្រទេសដាណឺម៉ាក នឹងទិញសព្វាវុធរបស់សហរដ្ឋអាមេរិកក្នុងតម្លៃ ១ពាន់លានដុល្លារអាមេរិក ដើម្បីគាំទ្រដល់វិស័យការពារជាតិរបស់អ៊ុយក្រែនប្រឆាំងនឹងរុស្សី ជាការកត់សម្គាល់ជុំដំបូងនៃការចំណាយក្រោមគំនិតផ្តួចផ្តើមថ្មីរបស់សម្ព័ន្ធយោធាណាតូ។

កិច្ចព្រមព្រៀងនេះ ត្រូវបានធ្វើឡើងតាមរយៈបញ្ជីតម្រូវការរបស់អ៊ុយក្រែនក្នុងអាទិភាព ជាយន្តការមួយដែលត្រូវបានចាប់ផ្តើមកាលពីខែមុនដោយប្រធានាធិបតីសហរដ្ឋអាមេរិក លោក Donald Trump និងអគ្គលេខាធិការសម្ព័ន្ធយោធាណាតូ លោក Mark Rutte ដើម្បីសម្រួលដល់ការគាំទ្រផ្នែកការពារជាតិរបស់សម្ព័ន្ធមិត្តសម្រាប់ទីក្រុងគីវ។ ទីក្រុងវ៉ាស៊ីនតោន កំពុងបញ្ចេញសព្វាវុធ និងយុទ្ធោបករណ៍សម្រាប់អ៊ុយក្រែនពីឃ្លាំងស្តុករបស់ខ្លួនក្នុងទំហំទឹកប្រាក់ ៥០០ លានដុល្លារអាមេរិក។ រដ្ឋាភិបាលហូឡង់បានប្រកាសទិញក្នុងទឹកប្រាក់៥០០លានអឺរ៉ូ ឬ(៥៧៧លានដុល្លារអាមេរិក) ពីឃ្លាំងស្តុករបស់អាមេរិក រួមមានទាំងគ្រឿងបន្លាស់សម្រាប់ប្រព័ន្ធមីស៊ីលប៉ាទ្រីយ៉ូត(Patriot) ផងដែរ។

ប្រទេសនៅតំបន់អឺរ៉ុបខាងជើងចំនួនបី មានស៊ុយអែត ន័រវែស និងប្រទេសដាណឺម៉ាក នឹងរួមគ្នាផ្តល់មូលនិធិចំនួន៥០០លានដុល្លារជាជំនួយផ្នែកយោធា ដោយប្រទេសស៊ុយអែត ផ្តល់ការរួមចំណែកចំនួន២៧៥លានដុល្លារ។ រដ្ឋមន្ត្រីការពារជាតិហូឡង់ លោក Ruben Brekelmans បាននិយាយនៅក្នុងការបង្ហោះនៅលើបណ្តាញ X ថា«ដោយគាំទ្រអ៊ុយក្រែនក្នុងការប្តេជ្ញាចិត្ត យើងកំពុងបង្កើនសម្ពាធលើរុស្ស៊ីក្នុងការចរចា» និងបានចាត់ទុកការវាយប្រហារតាមអាកាសរបស់រុស្សីជារៀងរាល់ថ្ងៃថាជា«ភេរវករពិតប្រាកដ» ។

លោកបាននិយាយថា «រុស្ស៊ីកាន់តែគ្រប់គ្រងភាគច្រើនលើអ៊ុយក្រែន នោះគ្រោះថ្នាក់កាន់តែខ្លាំងដល់ប្រទេសហូឡង់ និងសម្ព័ន្ធមិត្តណាតូរបស់យើង»។