ទីភ្នាក់ងារអង្គការសហប្រជាជាតិមួយបាននិយាយថា មនុស្សជិត៦០.០០០នាក់ បានភៀសខ្លួនចេញពីខេត្ត Cabo Delgado ភាគខាងជើងនៃប្រទេសម៉ូសំប៊ិក ក្នុងរយៈពេលពីរសប្តាហ៍ ស្របពេលមានការបះបោរអស់រយៈពេលជាច្រើនឆ្នាំដោយក្រុមយុទ្ធជនមានទំនាក់ទំនងជាមួយក្រុមរដ្ឋអ៊ីស្លាម ISIL (ISIS) ។

អង្គការទេសន្តរប្រវេសន៍អន្តរជាតិ (IOM) បាននិយាយនៅក្នុងសេចក្តីថ្លែងការណ៍មួយកាលពីថ្ងៃអង្គារសប្ដាហ៍នេះថា ការកើនឡើងនៃការវាយប្រហារដែលបានចាប់ផ្តើមនៅថ្ងៃទី ២០ ខែកក្កដា បានធ្វើឱ្យមនុស្សចំនួន៥៧.០៣៤នាក់ ឬ ១៣.៣៤២ គ្រួសារភៀសខ្លួន ។ 

អង្គការទេសន្តរប្រវេសន៍អន្តរជាតិដដែល បាននិយាយថាស្រុក ឈៀរ(Chiúre) គឺជាស្រុកដែលរងគ្រោះខ្លាំងជាងគេ ដោយមានមនុស្សជាង៤២.០០០នាក់ ត្រូវបានភៀសខ្លួនចេញពីលំនៅឋាន ដែលច្រើនជាងពាក់កណ្តាលនៃពួកគេគឺជាកុមារ។

លោក Paola Emerson ដែលជាប្រធានសាខានៃការិយាល័យអង្គការសហប្រជាជាតិ សម្រាប់ការសម្របសម្រួលកិច្ចការមនុស្សធម៌ (OCHA)ប្រចាំនៅប្រទេសម៉ូសំប៊ិក បានប្រាប់ទីភ្នាក់ងារព័ត៌មាន ថា រហូតមកដល់ពេលនេះ ជនភៀសខ្លួនប្រហែល៣០.០០០នាក់បានទទួលអាហារ ទឹក ទីជម្រក និងរបស់របរប្រើប្រាស់ក្នុងផ្ទះសំខាន់ៗ។

យោងតាមទិន្នន័យពីមជ្ឈមណ្ឌលសិក្សាយុទ្ធសាស្ត្រអាហ្រ្វិក បានឱ្យដឹងថា មនុស្សជាង៦.១០០នាក់ នាក់ត្រូវបានសម្លាប់ចាប់តាំងពីការចាប់ផ្តើមនៃការបះបោរ៕