អាហ្វ្រិក៖ យោងតាមអង្គការសុខភាពពិភពលោក (WHO) កាលពីថ្ងៃព្រហស្បតិ៍បានឱ្យដឹងថា ទ្វីបអាហ្វ្រិកមានករណីឆ្លងវីរុស COVID-19 ដែលត្រូវបានបញ្ជាក់មានចំនួនលើសពី ១០លានករណី ខណៈពិភពលោកឈានចូលដល់ឆ្នាំទី៣ នៃជំងឺរាតត្បាត។ នាយកផ្នែកសង្គ្រោះបន្ទាន់ប្រចាំតំបន់របស់អង្គការសុខភាពពិភពលោក លោកវេជ្ជបណ្ឌិត Abdou Salam Gueye និយាយថា ប្រជាជនជាង ២៣០,០០០នាក់បានស្លាប់នៅទ្វីបអាហ្វ្រិករហូតមកដល់ពេលនេះ។
លោកបាននិយាយថា អត្រាស្លាប់បានកើនឡើង ៦៤% ក្នុងអំឡុងពេលសប្តាហ៍មុន ជាពិសេសដោយសារតែមានករណីឆ្លងក្នុងចំណោមប្រជាជនដែលមានហានិភ័យខ្ពស់ ប៉ុន្តែអ្នកស្លាប់ និងការចូលសម្រាកព្យាបាលនៅមន្ទីរពេទ្យនៅតែមានកម្រិតទាប បើប្រៀបធៀបទៅនឹងរលកនៃការឆ្លងវីរុសកាលពីពេលមុននៅក្នុងទ្វីបនេះ។ ស្ថាប័នសុខភាពអន្តរជាតិជាច្រើនកំពុងជំរុញឱ្យរដ្ឋាភិបាល និងប្រជាពលរដ្ឋកុំឱ្យពឹងផ្អែកលើតែការចាក់វ៉ាក់សាំងបង្ការ ខណៈប្រទេសផ្សេងៗមានរលកនៃករណីឆ្លងកើនឡើងជំរុញដោយវីរុសបម្លែងខ្លួនថ្មី Omicron ទោះបីជា ៥០% នៃចំនួនប្រជាជនពិភពលោកបច្ចុប្បន្ននេះបានចាក់វ៉ាក់សាំងពេញលេញក៏ដោយ ខណៈនៅទ្វីបអាហ្វ្រិកមានត្រឹមតែ ១០% ប៉ុណ្ណោះ។ ទ្វីបនេះបានទទួលវ៉ាក់សាំងជាង ៦៦០លានដូស ហើយមានតែប្រមាណ ៣៤០លានដូសប៉ុណ្ណោះដែលត្រូវបានផ្តល់ដល់ប្រជាជនមកដល់ពេលនេះ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
