ក្រុមអ្នកជំនាញជំងឺឆ្លង បានធ្វើការព្រមាននៅថ្ងៃពុធនេះថា វីរុសឈីកទំនងជានៅតែមានក្នុងតំបន់ភាគខាងត្បូងប្រទេសចិនក្រោយរដូវទឹកជំនន់ ស្របពេលដែលភ្លៀងធ្លាក់ខ្លាំងបង្កើនសកម្មភាពរបស់សត្វមូស ។

ជំងឺឈីកដែលចម្លងដោយមូសខ្លា គ្មានវិធីព្យាបាលច្បាស់លាស់នោះទេ ហើយត្រូវបានគេដឹងថា វារីករាលដាលយ៉ាងឆាបរហ័ស ។ រោគសញ្ញារួមគ្រុនក្តៅ និងឈឺសន្លាក់ដៃជើងធ្ងន់ធ្ងរ បើទោះបីជាករណីស្លាប់កម្រក៏ដោយ ។

ផ្នែកជាច្រើននៅតំបន់ភាគខាងត្បូងប្រទេសចិន រយៈពេលប៉ុន្មានសប្តាហ៍កន្លងមកនេះ បានជួបប្រទះភ្លៀងធ្លាក់ខ្លាំងបំផុតក្នុងសតវត្សរ៍នេះ បង្កើតឲ្យមានត្រពាំង បឹងបួរសម្រាប់ឲ្យមូសបន្តពូជ ។

ក្រុមព្យាករបានព្រមានពីព្យុះផ្គររន្ទះបន្ថែមទៀត រយៈពេលមួយថ្ងៃ បន្ទាប់ពីផ្ទៃមេឃពីលើទីក្រុងហុងកុង បានប្រែក្លាយជាខ្មៅងងឹត និងបង្អុរភ្លៀងធ្លាក់ខ្លាំងក្លាបំផុតក្នុងខែសីហា ចាប់តាំងពីឆ្នាំ១៨៨៤មក នៅទីក្រុងហុងកុង ដែលជាមជ្ឈមណ្ឌលហិរញ្ញវត្ថុដ៏សំខាន់របស់អាស៊ី ។ 

វីដេអូតាមប្រព័ន្ធផ្សព្វផ្សាយបានបង្ហាញឲ្យឃើញពីផ្លូវលិចទឹកនៅក្នុងខេត្ត Guangdong ភាគខាងត្បូងប្រទេសចិន និងសេចក្ដីរាយការណ៍ពីការផ្ទុះឡើងកាន់តែអាក្រក់ទៅៗនៃជំងឺគ្រុនឈីក ដែលត្រូវបានជំរុញដោយការកើនឡើងនៃកំណើតមូសខ្លា ។ ខេត្ត Guangdong បានរាយការណ៍ថាមានករណីឆ្លងជំងឺគ្រុនឈីកជាង ៧ពាន់ករណីហើយមកទល់ពេលនេះ ។

លោកវេជ្ជបណ្ឌិត Leong Hoe Nam គឺជាអ្នកជំនាញជំងឺឆ្លងនៅគ្លីនិក Rophi ប្រទេសសិង្ហុបរី និយាយថា មូសត្រូវការបរិមាណទឹកតិចតួចប៉ុណ្ណោះ សម្រាប់ការបន្តពូជរបស់វា ។

ទីក្រុង Foshan ស្ថិតនៅភាគខាងលិចទីក្រុង Guangzhou បានក្លាយជាចំណុចកណ្តាលនៃការរីករាលដាលជំងឺឈីកក្នុងខេត្ត ខណៈទីក្រុងរាប់សិបកន្លែងទៀត បានរាយការណ៍ករណីឆ្លង ៕