អត្រាពន្ធថ្មីរបស់ប្រធានាធិបតីអាមេរិក លោក Donald Trump ដែលដាក់លើប្រទេសជុំវិញពិភពលោក បានចូលជាធរមានហើយ ដោយនេះជាការបង្កើននូវភាពតានតឹងផ្នែកសង្គ្រាមពាណិជ្ជកម្មរបស់លោក។

តាមរយៈការបង្ហោះសារ នៅលើបណ្ដាញសង្គម ពោលគឺប៉ុន្មាននាទីមុនថ្ងៃផុតកំណត់នាពាក់កណ្តាលអធ្រាត្រ នៅទីក្រុងវ៉ាស៊ីនតោនឌីស៊ី លោក Trump បានរៀបរាប់ថា៖ «ពាក់កណ្តាលអធ្រាត្រហើយ!!! ទឹកប្រាក់រាប់ពាន់លានដុល្លារពីពន្ធ ឥឡូវនេះ កំពុងហូរចូលសហរដ្ឋអាមេរិកហើយ!»។

នៅមុននេះ លោកប្រធានាធិបតីបានដាក់អត្រាពន្ធ ៥០ភាគរយលើប្រទេសឥណ្ឌា ដែលនឹងចូលជាធរមាន នៅថ្ងៃទី២៧ ខែសីហា ប្រសិនបើទីក្រុងញូវដេលីមិនឈប់ទិញប្រេងពីរុស្ស៊ីទេនោះ។ ហើយជាមួយគ្នានេះ លោក Trump ក៏បានគំរាមដំឡើងពន្ធ ១០០ភាគរយ លើបន្ទះឈីបកុំព្យូទ័រដែលផលិតដោយបរទេសផងដែរ ខណៈដែលលោកជំរុញក្រុមហ៊ុនបច្ចេកវិទ្យាឲ្យវិនិយោគនៅអាមេរិក។

គួរបញ្ជាក់ថា កាលពីសប្តាហ៍មុន រដ្ឋបាលរបស់លោក Trump បានប្រកាសពីការកែប្រែបញ្ជីពន្ធនាំចូលលើដៃគូពាណិជ្ជកម្មរាប់សិប និងបានពន្យាកាលកំណត់ ដើម្បីឲ្យប្រទេសនានាឈានដល់កិច្ចព្រមព្រៀងជាមួយសហរដ្ឋអាមេរិក ដល់ថ្ងៃទី៧ ខែសីហា។

បណ្តាប្រទេស បាននិងកំពុងធ្វើការឥតឈប់ឈរ ដើម្បីឈានដល់កិច្ចព្រមព្រៀងជាមួយទីក្រុងវ៉ាស៊ីនតោន ក្នុងគោលបំណងទម្លាក់ ឬបើអាចលុបចោលតែម្ដង នូវអ្វីដែលលោក Trump ហៅថា «អត្រាពន្ធបដិការ»។ គោលនយោបាយពាណិជ្ជកម្មរបស់លោក គឺសំដៅលើការកែទម្រង់ប្រព័ន្ធពាណិជ្ជកម្មសកល ដែលលោកមើលឃើញថា បានប្រព្រឹត្តិចំពោះសហរដ្ឋអាមេរិកដោយអយុត្តិធម៌៕