ក្រសួងការពារជាតិ បាននិយាយកាលពីថ្ងៃពុធថា ប្រទេសអេស្ប៉ាញ បានសម្រេចចិត្តប្រឆាំងនឹងការទិញយន្តហោះចម្បាំង F-35 ដែលផលិតដោយសហរដ្ឋអាមេរិក ហើយនឹងជំនួសមកវិញនូវជម្រើសដែលផលិតដោយអឺរ៉ុប ដោយបញ្ជាក់របាយការណ៍មួយ នៅក្នុងសារព័ត៌មាន El Pais។

ការសម្រេចចិត្តនេះ បានធ្វើឡើង បន្ទាប់ពីភាពតានតឹងរវាងទីក្រុងម៉ាឌ្រីដ និងវ៉ាស៊ីនតោនជុំវិញការបដិសេធរបស់ប្រទេសអេស្ប៉ាញ ក្នុងការបង្កើនការចំណាយលើវិស័យការពារជាតិដល់ ៥,0ភាគរយនៃ    ទិន្នផលសេដ្ឋកិច្ច តាមការទាមទារដោយប្រធានាធិបតីអាមេរិកលោក ដូណាល់ ត្រាំ ( Donald Trump)។

កាសែត El Pais បានរាយការណ៍កាលពីព្រឹកថ្ងៃពុធដោយដកស្រង់ប្រភពរដ្ឋាភិបាល ដែលមិនបញ្ចេញឈ្មោះថា រដ្ឋាភិបាលឆ្វេងនិយមរបស់នាយករដ្ឋមន្ត្រីអេស្ប៉ាញលោក Pedro Sanchez បានលុបចោលផែនការទិញយន្តហោះ F-35 ហើយនឹងស្វែងរកយន្តហោះចម្បាំងផលិតដោយអឺរ៉ុបវិញ។

រដ្ឋាភិបាល បានកំណត់ថវិកាចំនួន ៦,២៥ ពាន់លានអឺរ៉ូ (៧,២៥ ពាន់លានដុល្លារ) នៅក្នុងថវិកាឆ្នាំ ២០២៣ របស់ខ្លួន ដើម្បីទិញយន្តហោះចម្បាំងថ្មី។ កាសែតនេះ បាននិយាយថា សារព័ត៌មានការពារជាតិនិងសន្តិសុខអង់គ្លេស Janes បានរាយការណ៍ថា ប្រទេសអេស្ប៉ាញ កំពុងពិចារណាទិញយន្តហោះ F-35 រហូតដល់ ៥០គ្រឿង។

សារព័ត៌មាននេះ បានបន្ថែមថា ប៉ុន្តែផែនការរបស់រដ្ឋាភិបាលក្នុងការចំណាយភាគច្រើននៃទឹកប្រាក់បន្ថែមចំនួន១០,៥ ពាន់លានអឺរ៉ូ នៅក្នុងការចំណាយលើវិស័យការពារជាតិ ដែលបានប្រកាសសម្រាប់ឆ្នាំនេះ បានច្រានចោលការទិញយន្តហោះចម្បាំង F-35។