ប្រមុខសិទ្ធិមនុស្សរបស់អង្គការសហប្រជាជាតិ បាននិយាយកាលពីថ្ងៃពុធ (៦ សីហា) ថា ក្រុមឧទ្ទាមដែលគាំទ្រដោយប្រទេសរ្វ៉ាន់ដា បានសម្លាប់មនុស្សយ៉ាងហោចណាស់ ៣១៩នាក់ ក្នុងរយៈពេលមួយខែកន្លងមកនេះ នៅភាគខាងកើតប្រទេសកុងហ្គោ ដោយពណ៌នាចំនួនអ្នកស្លាប់នេះថាច្រើនបំផុតមួយ ដែលត្រូវបានកត់ត្រាក្នុងការវាយប្រហារបែបនេះ ចាប់តាំងពីក្រុមឧទ្ទាម M23 បានងើបធ្វើសកម្មភាពបះបោរឡើងវិញនៅឆ្នាំ២០២២។

ប្រមុខសិទ្ធិមនុស្សរបស់អង្គការសហប្រជាជាតិ លោក Volker Türk បាននិយាយក្នុងសេចក្តីថ្លែងការណ៍មួយថា ក្រុមឧទ្ទាម M23 ដែលគាំទ្រដោយសមាជិកនៃកងកម្លាំងការពារប្រទេសរ្វ៉ាន់ដា បានកំណត់គោលដៅភូមិចំនួន៤ នៅក្នុងទឹកដី Rutshuru ខាងជើងនៃខេត្ត Kivu របស់កុងហ្គោ ចន្លោះពីថ្ងៃទី០៩ ដល់ថ្ងៃទី២១ ខែកក្កដា។

អំពើហិង្សាបន្តអាចគំរាមកំហែងដល់កិច្ចប្រឹងប្រែងដឹកនាំដោយកាតា ដើម្បីនាំកុងហ្គោ និងក្រុមឧទ្ទាមនោះ ចុះហត្ថលេខាលើកិច្ចព្រមព្រៀងសន្តិភាពអចិន្ត្រៃយ៍ត្រឹមគោលដៅនៃថ្ងៃទី១៨ ខែសីហា។ លក្ខខណ្ឌមួយក្នុងចំណោមលក្ខខណ្ឌជាច្រើននៃកិច្ចព្រមព្រៀងសន្តិភាពនេះគឺការការពារជនស៊ីវិល និងការវិលត្រឡប់ប្រកបដោយសុវត្ថិភាពនៃជនភៀសខ្លួនរាប់លាននាក់ ដោយសារជម្លោះ។

ភាគីជម្លោះទាំងពីរនេះកាលពីថ្ងៃទី១៩ ខែកក្កដា បានចុះហត្ថលេខាលើសេចក្តីប្រកាសជាគោលការណ៍មួយនៅកាតា ដើម្បីបញ្ចប់ការប្រយុទ្ធគ្នា និងប្តេជ្ញាចិត្តចំពោះកិច្ចព្រមព្រៀងសន្តិភាពដ៏ទូលំទូលាយមួយ។ ទោះយ៉ាងនេះក៏ដោយ សេចក្តីថ្លែងការណ៍ថ្មីរបស់អង្គការសហប្រជាជាតិបាននិយាយថា ការវាយប្រហារដ៏បង្ហូរឈាមលើជនសីវ៉ិល កើតឡើងប៉ុន្មានថ្ងៃបន្ទាប់ពីការចុះហត្ថលេខានោះ៕